Anda di sini

Komuniti Dayak begunaka agih belanja ari perintah besai: Jugah

Advertisement
JUGAH
JUGAH

KUCHING: Komuniti Dayak di Sarawak begunaka agih belanja ari perintah besai baka komuniti Orang Asal di Semenanjung Malaysia, ku Kaban Parlimen (MP) Lubok Antu Jugah Muyang.

Kebuah pia laban majoriti di Sarawak agi tinggal dalam pemansang begulai enggau komuniti bukai ti diau ba menua ulu ti agi bedau ngasaika pemansang.

“Dayak di Sarawak begunaka belanja baka ti diberi ngagai komuniti Orang Asal ari perintah besai kena mai mayuh agi perengka guna ungkup komuniti Dayak ba dalam nengeri tu kelebih agi di menua pesisir,” ku iya nambah dalam penerang iya kemari.

Jugah mega mai pekara nya ke Debat Bajet Parlimen 2021 ba Dewan Rakyat bedau lama ti udah laban ngasaika komuniti Dayak begunaka agih belanja nya kena mantu komuniti nya ditu.

“Bisi sekeda kandang menua Dayak di Sarawak bedau ngembuan akses penyambung jalai alun, bekal ai beresi sereta ngarapka perintah besai berundingka peminta nya,” ku iya nyemetak.

Kena nyukung penemu nya, Jugah madahka pekara nya nyata kelebih agi dalam kandang menua dipegai iya ti ngembuan mayuh peranak komuniti Dayak ke mega jauh kena tinggal ari pemansang.

Tu nyata lebuh komuniti Dayak di Sarawak agi bedau ngasaika pengelantang pemansang pengudah meda ripot ari surat berita ba sitak iya di Lubok Antu.

Dalam ripot nya, siku pengajar Dayak di Nanga Sumpa, Lubok Antu udah ngena inisiatif mai bala nembiak iya bejalai penyauh dua jam dalam kampung ketegal deka ngiga rentayan telekomunikasyen kena mantu dalam sesi belajar bala nembiak iya.

“Baka nya mih pekara ti ditapi komuniti Dayak di Sarawak ke mesti ngetanka diri. Nya alai, iya ngarapka perintah ngemeratka komuniti Dayakdi sitak dipegai aku sereta ba selampur Sarawak,” ku iya nerang.

Kelimpah ari nya, iya mega madahka mayuh agi jalai penyambung patut digaga ba kandang menua pesisir kelimpah ari bekal ai beresi ungkup rayat di Lubok Antu lalu mega ngangkatmanah perengkaguna pengerai ditu.

Perengkaguna pengerai ti kritikal diguna ba Lubok Antu iya nya sebuah palan dialisis ba pasar mit Lubok Antu, laban diatu perengkaguna nya semina bisi di Betong enggau Sri Aman.

Bedau lama ti udah, dalam Bajet Malaysia 2021, Menteri Pekara Wang Datuk Seri Tengku Zafrul Abdul Aziz udah madahka sepenyampau RM158 juta diguna ungkup komuniti Orang Asal di Semenanjung.

Zafrul madahka agih belanja nya ungkup guna bejaliaka Program Bantu Rama enggau Program Pemansang Bersepadu ungkup genturung pendiau Orang Asal.

Di Malaysia enggau Indonesia, ‘Dayak’ iya nya raban enggau komuniti etnik Orang Asal ukai Islam ba pulai Borneo, kelebih agi ba kandang menua ulu.

Ari baruh penerang nya, ku iya nyemetak, madahka mayuh etnik sereta etnik mit ti diau di pulau Borneo lalu iya pechaya lebih 30 raban etnik ti ngembuan mayuh bansa jaku tauka basa.

Advertisement