KUCHING: Gerempung Orang Dagang Mit enggau Jelan Pemesai (PKS) Sarawak pechaya PKS di nengeri tu ulih napi pemar ekonomi empas ari pandemik COVID-19 enggau sukung sereta bantu ari perintah.
Presiden PKS Sarawak Dato Seri Charles Voon madahka perintah besai ari baruh Menteri Besai Tan Sri Muhyiddin Yassin udah madahka pakej rangsangan ekonomi ‘Kita Prihatin’ sepenyampau RM10 bilion kena September, nyendiaka bantu ngagai sektor dagang ba selampur menua.
“Kelimpah PKS, dagang mikro mega udah meri sukung ti besai ngagai ekonomi menua lalu aku ngarapka perintah deka nyendiaka bantu ti diguna ngagai sektor tu maya timpuh kritikal diatu,” ku iya dalam penerang iya kemari.
Voon madah naka ke ditemu pakej rangsangan ekonomi nya enda ulih mungkur semua aspek pemar ti ditapi komuniti dagang tang ngarapka perintah besai deka nyendiaka bantu ti dikerembai ngagai bidang ke nyadi juluk nyengkaum ngatur penyampau bayar chukai korporat.
“Taja pia, aku optimis sektor dagang di menua tu ulih tan ari kena empas pandemik COVID-19 lalu megai tanggungpengawa sida dalam pengawa mulaika pemanah ekonomi menua.
“Tu ulih digaga asalka sektor peribit enggau perintah ulih sama bekereja enggau rat,” ku iya nambah.
Voon madahka gerempung nya diatu mantu pengempu dagang ngaga peminta mayuh macham insentif serta madahka sida bekaul bantu mata duit ti bisi disediaka.