Anda di sini

Perintah Sarawak ngenuku sereta ngetanka hak rayat

Advertisement
 Awang Tengah (tiga kiba) nyuaka surat pala tanah ngagai siku penerima seraya dikemata (ari kanan) Nyurak, Liwan enggau raban ari JTS.
SURAT PALA TANAH: Awang Tengah (tiga kiba) nyuaka surat pala tanah ngagai siku penerima seraya dikemata (ari kanan) Nyurak, Liwan enggau raban ari JTS.

BELAGA: Perintah Sarawak seruran ngenuku sereta ngetanka hak rayat ba tanah Hak Adat Bansa Asal (NCR) nyema peminta nya endang sah sereta nitihka atur undang-undang.

Sapit Kepala Menteri Datuk Amar Awang Tengah Ali Hassan madah, pengawa nyukat sereta ngemansutka surat pala tanah NCR udah dipejalaika perintah kenyau ari taun 1960-an nyentukka 2010 baka Organisasyen Mutarka, Nyukat Bahagian III Kanun Tanah Negeri sereta ke bukai.

Ku iya, dalam timpuh 50 taun nya (1960-2010), output chara nyukat ti lama tu endang tentu manah, semina pemesai urung 260,000 hektar (642,460 ikar) tanah NCR mujur disukat tauka pukul rata nya semina pemesai 5,200 hektar tanah NCR ulih disukat setaun.

Kebuah pia, ku iya, ba komitmen perintah dalam ngetanka hak rayat ba tanah NCR ke sah ti nitihka undang-undang nya alai pengawa nya digaga kena nyungkak proses nyukat kena nentuka pengempu tanah NCR bisi ngembuan dokumen pengempu, garis entara tanah ti nyata lalu enda ditama enggau nadai pemendar iya nya enggau bejalaika Program Nyukat Tanah NCR Inisiatif Baru 2010.

“Program tu dipejalaika dalam dua renggat iya nya nyukat kelingi enggau gazet ari baru Seksyen 6 Kanun Tanah Nengeri ngagai Rizab KomunalBumiputera (Betanam Betupi). Renggat kedua pengawa nyukat ngena chara lot individu ke lalu bisi ngemansutka surat hak pengempu tanah ari baruh Seksyen 18 kaun tanah nengeri,” ku iya.

Iya bejaku munyi nya lebuh ti bejaku ba Pengerami Nyuaka Chek Pampas Tanah sereta Surat Pala Tanah Ari Baruh Seksyen 18 Kanun Tanah Nengeri Bagi Menua Kapit ba Balai Komuniti Belaga kilah ensana.

Menteri Pemansang Mengeri enggau Pengeraja Asal Kedua sereta Menteri Dagang Antarabansa enggau Industri, Terminal Industri enggau Pemansang Orang Dagang nya madahka, pengawa nyukat tu bepelasarka peminta tanah NCR ti dikemendar sereta sesi dialog diatur enggau sida ti minta tanah NCR bekaul sebedau aktiviti nyukat berengkah dipejalaika.

“Pengawa nyukat tanah deka dipejalai pengudah nerima pemendar enggau sukung ari sida ti ngaga peminta nyukat tanah nya. Nyema enggaika tanah sida disukat kelingi, pengawa nyukat enda dipejalai,” ku iya.

Kelimpah ari nya, ku iya, ungkup kes ti benung dipechara ba kort, pengawa nyukat tanah enda deka dipejalai kelimpah kes nya udah tembu tauka ditarit pulai baru ari sida ti bekaul.

Taja pia, ku iya, nyema deka nyereta baru Program Nyukat Tanah NCR Inisiatif Baru tu, peminta baru mesti dianjung.

“Ari taun 2010 nyentukka diatu, Opis Tanah enggau Survei (JTS) Sarawak udah mujur nyukat ngena chara nyukat kelingi urung 952,905 hektar (2.354 juta ikar). Ari peyampau nya 753,456 hektar tauka 1.8 juta ikar ti udah digazet,” ku iya.

Ku iya nerang, tu iya nya satu progrmam nyukat ti efisyien lalu endang beguna dalam nentuka garis entara tanah NCR sereta direjista dalam Rejista Tanah enggau Gazet Komunal Rizab Bumiputera ari baruh Seksyen 6 Kanun Tanah Nengeri.

Ku iya nambah, naka diatu bisi 37,039 lot individu mujur disukat ti ngaul kandang menua pemesai 46,113 hektar (113,947 ikar)ti udah lalu deka dipansutka surat pala tanah ari baruh Seksyen 18 Kanun Tanah Nengeri.

Nya alai, ku iya, bisi 62 surat pala tanah disuaka ngagai 55 iku penerima ba sitak Batang Rajang, Balui Belaga ke alai enggau pemisi dokumen nya ngayanka garis entara tanah nya nyata agi lalu enda ulih dikejakuka agi.

Ku iya, Surat Pala Tanah Seksyen 18 Kanun Tanah Nengeri udah netapka timpuh megai nya ti meruan lalu enda ibuh mayar nama-nama premium tanah, nya enda bebayar lalu fi lain enda dikira.

Sama bisi Menteri Muda Elekterik Menua Pesisir ke mega Kaban Kunsil Nengeri (ADUN) Belaga Datuk Liwan Lagang, ADUN Murum Kennedy Chukpai Ugon, Residen Bagi Menua Kapit Nyurak Keti, Pemesai Opis Pelilih Belaga Juan Ubit, Peneritadat JTS Bagi Menua Kapit Sagu Unting, Sekretari Politik Kepala Menteri Beatrice Kedoh Tajang, Micheal Mujah Lihan enggau CHarles Balan Seling.

Advertisement