KUCHING: Semua sekula primari di Sarawak deka disediaka komputer Raspberry PI taun baru.
Menteri Pelajar, Sains enggau Pansik Teknologi Datuk Amar Michael Manyin Jawong madahka pekara nya ba aum pengarang berita ba Kampung Kakeng, Serian, kemari.
Nitih ku Manyin bisi 1,265 sekula primari di Sarawak lalu tetiap sekula nya deka disediaka beberapa unit.
Komputer Raspberry PI tu ku iya, lebih efektif ari komputer ti deka dibeli perintah nengeri.
"Kepala Menteri Datuk Patinggi Abang Johari Tun Openg udah ngemendarka ungkup belanja kena meli Komputer Raspberry PI.
"Kitai udah ngaga sempekat enggau Sarawak Information Systems Sdn. Bhd. (SAINS) ti deka mekalka semua Raspberry," ku iya.
Dulu ari nya, Manyin bejadi Program Agriculture Community Outreach (Agricop) ba Kampung Kakeng nya.
Bejaku baru, Manyin madah berindik ari penyadi COVID-19, Raspberry ti dibeli ari England deka laun datai sereta laun disadung.
Taja pia ku iya, pengawa meli enggau ngagihka komputer tu ngagai semua sekula primari udah dikemendarka Kepala Menteri ngena ungkus belanja RM12 juta.