Anda di sini

RM1,419,160 duit pampas dibayar ngagai pengempu tanah di Belaga

Advertisement
 Awang Tengah (tiga kiba) nyuaka chunto chek ungkup semua penyampau pampas, iya nya RM1,419,160.34 ngagai pengempu tanah ti mungkur pengawa ngaga tiga projek rayat ti dipejalaika Perintah Sarawak di Belaga.
PENYAMPAU SEMUA PAMPAS : Awang Tengah (tiga kiba) nyuaka chunto chek ungkup semua penyampau pampas, iya nya RM1,419,160.34 ngagai pengempu tanah ti mungkur pengawa ngaga tiga projek rayat ti dipejalaika Perintah Sarawak di Belaga.

BELAGA: Tanah ti diempu peranak menua ti dikena ke tuju ngemansangka perengkaguna rayat deka dibayar pampas nitihka pematut bepelasarka undang-undang, setipak enggau Kanun Tanah Nengeri (Bab 81) enggau Pekara 13 Konstitusyen Perintah Besai.

Sapit Kepala Menteri Datuk Amar Awang Tengah Ali Hasan madah,perintah enda ngambi tanah enggau enda bebayar tang nitihka undang-undang sereta mayar pampas nitihka pematut ngagai pengempu tanah.

Ku iya, kita ulih meda mayuh macham projek pemansang infrastruktur ti udah dikemendar enggau benung digaga perintah, ambika chunto kereja ngangkatmanah jalai tebing pantai,ngaga Projek Jalai Besai Kedua,beberapa buah jematan benung digaga enggau ke bukai.

Taja pia ku iya, semua projek pemansang ungkup rayat ti bekaul enggau ngambil tanah peranak menua tetap deka dibayar perintah.

Nya alai ku iya, pengawa nyuaka chek pampas tanah tu mandangka rayat nyukung sereta nemu juluk ati perintah ti meri kerejasama ke pemaik jemah ila.

“Sehari tu perintah deka nyuaka Chek Pampas Tanah ungkup Projek Jalai Tama ke Uma Sambop Belaga ngagai 28 penerima (34 chek) ke sepenyampau RM267,449.90; Projek Jalai Bakun Bypass ungkup tiga iku penerima ke sepenyampau RM27,540.20 enggau Projek Ngangkatmanah Ngaga Jalai Belaga ke Menjawab ungkup 150 penerima (160 chek) ke sepenyampau RM1,124,170.24 lalu semua nya RM1,419,160.34,” ku iya.

Iya bejaku munyi nya ba Pengerami Nyuaka Chek Pampas Tanah enggau Surat Pala Tanah Ari baruh Seksyen 18 Kanun Tanah Nengeri Bagi Menua Kapit di Balai Mensia Mayuh Belaga, kemari.

Menteri Pemansang Mengeri enggau Pengeraja Asal Kedua ke mega Menteri Dagang Antarabansa enggau Industri, Terminal Industri enggau Pemansang Orang Dagang nya madah,projek pemansang ti digaga perintah, endang meri pemaik ke besai reti ngagai rayat.

“Perintah Sarawak ngaga pemansang infrastruktur baka jalai alun kena nyantilkamenua pesisir enggau mengeri besai, laban beratika peranak menua pesisir di Sarawak suba ngena sungai nyadi batang jalai sida mindah ngagai sesiti endur ke mar dilawa,” ku iya.

Ku iya,langgur pemansang baka ngaga jalai darat tauka jalai alun dipejalaika ketegal faktor guna rayat ba kandang menua nya kelebih agi ari sukut pengelikun.

Tambah iya,sungai ke nyadi batang jalai peranak di menua nya  sebedau tu, mega bisi risiko ari sukut pengelikun.

Nya alai, nengah pengawa ngaga projek ke baka tu ku iya, nya nyata meri pemaik ngagai rayat kelebih agi di Belaga ti lalu mandangka semua ke udah diperambu perintah Sarawak, tetap deka digaga ke pengelantang enggau penyenang rayat.

Sama bisi ngulu pengerami nya, Menteri Muda Elekterik Menua Pesisir ke mega Kaban Kunsil Nengeri Belaga, Datuk Liwan Lagang, Residen Bagi Menua Kapit Nyurak Keti, Pemesai Opis Pelilih Belaga Juan Ubit, Opis Tanah enggau Survei (JTS) sereta bala ti dipebasa ke bukai.

Advertisement