SELANGAU: Projek Ngangkatmanah Rumah Miskin Sarawak (PPRMS) nyadi komitmen enda ngetu ari perintah Sarawak dalam mantu rayat di nengeri tu.
Kaban Kunsil Nengeri (ADUN) Tamin Christopher Gira Sambang madah, projek tu deka nentuka sida endang patut bulih rumah ke lantang endur diau.
“PPRMS tu mayuh meri pemaik dalam mantu ngurangka tating penusah rayat ti kurang penatai pemisi, nyeliahka peminta nganti pemendar dalam timpuh ti lama, bejalaika enggau efisyien sereta nengah konsep beripai,” ku iya nerang ngagai pengarang berita kemari.
Dulu agi ari nya, bisi lima buah rumah panjai dalam sitak Kunsil Nengeri (DUN) Tamin nerima bantu kereban dikena berumah nengah PPRMS.
“Penerima PPRMS sekali tu iya nya Rumah Juli, Kemena Balingigan (12 pintu) bantu atap spandek, Rh Banyoi, Sungai Pelugau Balingian (14 pintu) bantu atap spandek.
“Rumah Jungan (sepintu) bantu siling, Rh Merom Jelani, Ulu Mukah (21 pintu) bantu atap spandek enggau Rh Ramping Mugang, Ulu Mukah (28 pintu) bantu atap spandek,” ku iya nambah.
Sama bisi datai iya nya Pemesai Opis Pelilih Menua Selangau Inting Nyami, pengari Palan Servis Dun N59 Tamin sereta peranak di kandang menua nya.