MIRI: Opis Kereja Raya (JKR) Miri deka mansik enggau silik taun nyin ila dalam mutarka penanggul jalai dedat ke lalu ulih ngangkatka tikas pengelikun jalai alun ba kandang endur Jalai Riam.
Menteri Perengka Pengangkut Sarawak, Datuk Lee Kim Shin madahka siti perambu timpuh panjai mesti dipejalaika kena mutarka penanggul jalai dedat ba palan nya.
“Kitai mesti ngambi pemutus enggau tumu enggau ngangkatmanah sistem jalai alun berindik ari jalai tu ukai semina nyadi jalai ke ditengah mensia mayuh tang mega dampih enggau sekula ke ulih ngujungka jalai nya dedat,” ku iya madah ngagai media pengudah meresa palan projek endur ngengkahka entukar tambah ungkup Sekula Sekondari Jalai Riam (RRSS) kemari.
Iya ti mega Kaban Kunsil Nengeri (ADUN) Senadin nya madahka, kelimpah ari RRSS, jalai nya mega dampih enggau Institut Teknologi Riam sereta sekula baru, Sekula Antarabansa Riam Hill.
“Berindik ari nya sekula tu dikelingi genturung pendiau, kami mega dekaka perambu ti manah agi dalam nyaga pengelikun nembiak sekula sereta penguna jalai alun sereta peranak di kandang menua nya,” ku iya.
Bejaku enggau silik beaul palan endur ngengkahka entukar tambah ungkup RRSS, Lee ngarapka nya ulih tembu dalam timpuh sebulan, sebedau sekula dibuka baru taun nyin ila.
Nitih ku iya, kapasiti palan endur ngengkahka entukar ke udah bisi ti besepiak enggau palan projek baru tu endang nyauka penuh enggau entukar nembiak.
“Kitai ngarapka palan endur ngengkahka entukar ti besai agi lalu ulih ngangkup penyampau entukar nembiak, pengajar sereta staf ketetiga sekula tu,” ku iya nerang.
Beserimbai enggau nya, Chairman Kaunsil Direktor Sekula RRSS Datuk Seri Law Liu Kiong udah meri besai terima kasih ngagai perintah nengeri ti seruran meri sukung dalam pemansang sekula China di mengeri tu.
“Enggau sukung ti tegap ari perintah nengeri, RRSS ulih ngerikod mayuh macham penyulut dalam bidang akademik tauka ukai akademik,” ku iya.
Ku iya nambah, kerejasama rat kaunsil direktor sekula enggau perintah nengeri endang beguna dalam pengawa ngangkatka pemansang pelajar orang China di nengeri tu.
Sama bisi datai Injinir Opis Kereja Raya (JKR) Miri Chong Chi Fam, Kaban Opis Kaunsil Kueh Chie Tiong, ketuai komuniti enggau raban kaunsil sekula.