SELANGAU: Kaban Kunsil Nengeri (ADUN) Tamin Christopher Gira Sambang udah ngagihka belanja sepenyampau RM50,000 kena nyungkak pengawa ngatur aktiviti lumba enggau main sereta rekreasyen ba sitak DUN Tamin ba taun 2021.
Ku iya, pengawa ngagihka geran nya kena meri peransang kelebih agi ngagai raban nembiak dalam ngaul diri enggau aktif ba aktiviti ti manahka pengerai.
“Kaul raban nembiak dalam aktiviti lumba enggau main sereta rekreasyen endang beguna kena nyeliahka sida tepejuh enggau penyalah rama,” ku iya nerang.
Gira madah munyi nya pengudah bejadika Pengerami Nutup Pekit Main Takraw Trofi YB Ir Christopher Gira Sambang ba Balai Mayuh Guna Selangau, kemari.
Gira ngarapka mayuh agi raban nembiak di Selangau tu ngatur aktiviti lumba enggau main nyengkaum main futsal enggau mayuh agi.
“Ungkup projek RTP 2021, aku udah nyendiaka agih belanja kena ngaga padang futsal ba sitak Siong Hilir, Siong Tengah, Siong Ulu, Pelugau, Sg Wong Kua Ulu Mukah enggau Pasar Stapang.
“Sebedau beberapa padang futsal udah digaga dalam agih belanja RTP ti udah. Enggau pemisi perengkaguna tu ila deka nyungkak mayuh agi raban nembiak ngaul diri dalam aktiviti lumba enggau main sereta aktiviti rekreasyen.
“Meri pengaga ati ngagai tim ti udah mujur lalu ngagai sida ti enda mujur, tau nguji baru ba pekit ti deka datai,” ku iya.
Bisi 24 tim udah ngambi bagi dalam pekit ti dipejalaika pengelama dua hari nya.