BETONG: Kunteriktor ti dipadu ngaga Projek Transformasyen Menua Pesisir (RTP) dilalau baru ngambi bejalaika projek nitihka timpuh ti udah ditetapka.
Kaban Kunsil Nengeri, Gerald Rentap Jabu madah, nya beguna amat ngambika sida ti bulih penguntung ari projek nya ulih ngasaika pengelantang tauka penguntung.
Ku iya, rayat enda lantang ati enti kunteriktor enda bejalaika projek nitihka timpuh ke udah ditetapka.
"Tu 'Projek Rayat' ti begunaka mayuh belanja. Tentu ke tu dipejalaika enggau manah sereta nitihka timpuh ti udah ditetapka.
"Nyadi pengari rayat ke dipilih sida (rayat), kami ti alai sida enda lantang ati tauka ringat lalu pengujung iya (enti enda ditembu nitih ti udah ditimpuh). Nya alai aku ngelalau, gaga sereta tembu nitih ti udah ditimpuhka," ku iya.
Rentap madahka pekara sebedau ngulu licha pejalai RTP DUN Bukit Saban enggau Layar ti diatur ba Opis Residen Betong ditu, kemari.
"Perintah ulih bejalaika eksyen ngerintaika sida ti salah ba 'blacklist'," ku iya ngelalau pasal pekara nya.
Berebak enggau tu, Rentap mega bisi ngenang sekeda kes kunteriktor ti enggai mendingka penemu ari rayat bekaul enggau pekara ke patut dipejalaika.
Iya ngarapka kunteriktor enggau rayat ke empu projek nya ulih sama berunding ngambika projek nya mujur.
"Aku ngarapka kededua ulih bebatak asur tauka berunding ngambika projek nya mujur dipejalaika.
"Nyema bisi isu, bai pekara nya ngagai kami tauka ngagai Opis Residen tauka Opis Pelilih Menua." ku iya.
Nyerumba program nya kemari, Gerald bisi nyuaka geran sepenyampau RM40,000 ngagai empat opis perintah ditu.
Bisi datai, Sekretari Politik Kepala Menteri Dr Richard Rapu ngarika Sapit Kepala Menteri ti mega ADUN Layar Datuk Amar Douglas Uggah Embas, Residen Bagi Menua Betong Friday Belik enggau sapit iya Abang Mohamad Abang Trukey sereta sida ke bukai.