KUCHING: Opis Menteri Dagang Dalam Nengeri enggau Pekara Penguna (KPDNHEP) seruran bebendar deka nentuka program nyemaka ke rega barang di Sabah enggau Sarawak dipejalaika enggau efektif.
Menteri Dagang Dalam Nengeri enggau Pekara Penguna (KPDNHEP),Dato Sri Alexander Nanta Linggi madah, kelebih agi pengudah ungkup belanja RM40 juta dalam Perambu Belanja 2021 enti dibandingka enggau RM20 juta setaun sebedau tu.
Terang iya, bisi sekeda kebuah ditemu bekaul enggau rega barang ti bebida entara Sabah, Sarawak enggau Semenanjung, nyengkaum ungkus logistik ti tinggi, saiz dagang ti mit, e-dagang bedau mungkur semua enggau polisi 'local first'.
"KPDNHEP diatu dalam proses nyendiaka siti surat pemadah ngagai bala Menteri pasal isu rega barang di Sabah, Sarawak, Labuan enggau Semenanjung ti enda sebaka, kena mantu ngelangkar chara mutarka enggau patut.
"Tu nyengkaum ngenegapka Program Nyemaka ke Rega Sabah, Sarawak enggau Labuan (Port to Port) sereta Program Nyadung Barang Ke Patut, LPG enggau 'Community Drumming' ti ngena manah ungkup belanja ari baruh Perambu Bajet 2021," ku iya.
Nanta madah, pekara nya dalam randau khas “Agenda Awal - COVID-19:Belanjawan 2021 Dan Cabaran Mengurus Impak Pandemik” ti ditaburka nengah Astro Awani, malam ensanus.
Bejaku baru, iya madahka perintah nanggung ungkus perengka pengangkut ari pemekal ngagai kandang menua ulu ke dipilih ungkup tujuh bansa barang ti dikena ninting hari besubsidi tauka dijaga perintah, baka gula putih betapis kasar, tepung gandum ke guna semua, minyak sumai sawit chulin, beras putih, gis petroleum lela (LPG), petrol RON95 enggau diesel kena mantu ngelempungka ungkus pengidup ninting hari peranak di menua ulu ti bekaul.
Iya madahka pekara nya dikemeratka berindik ari bekal enggau rega barang ke diguna ninting hari ba makit, iya nya dua isu besai ti ngirauka ati penguna dalam menua tu.
Opis menteri ku iya deka terus ngenegapka operasyen matau enggau neritka atur kena nambahka pengarap rayat betapi enggau gaya ti enda meruan diatu.
"Kami amat ibuh sereta beratika pengirau ati tauka penusah rayat, enggau kuasa meli penguna ti sama tekeruga kenyau ari pengelekai pandemik COVID-19, kelebih agi pengudah Atur Nagang Pemindah (PKP) dipejalaika.
"Nya alai, opis menteri udah bejalaika pelin atur kereja lengkas, kelebih agi bekaul enggau operasyen matau enggau penerit atur ti nadai ngetu kena meri pengarap ngagai rayat," ku iya.
Ku iya, chara nya dikena nyeliahka ari meli barang ngelui ari ke patut, laban bekal barang ke diguna ninting hari semampai chukup ba makit, kelimpah ari ulih dibeli ngena rega ke patut sereta enda meri pemerat ba belanja.
"Nya mega dikena nentuka orang dagang seruran nitihka atur ti diteritka sereta enda beambi ulih maya kitai betapi enggau penusah diatu nyentuk ke ulih ngeruga pengeran tauka pemendar numbuhka ekonomi domestik menua," ku iya.