SELANGAU: Kaban Kunsil Nengeri (ADUN) Tamin, Christopher Gira Sambang udah bejadi pengerami nasih tanah projek Bekal Elekterik Menua Pesisir (BELB) ba Rumah Lang Ganya, Nanga Meruan, Jalai Dijih.
Ku Gira, projek BELB nya dipelabaka tembu digaga dalam bulan Disember tu ila, deka mekalka elekterik 24 jam ngagai peranak di rumah panjai nya.
“Aku mega bisi nyuaka chek geran projek mit pemansang menua pesisir (MRP) RM195,000 ngagai Komiti Pemansang enggau Pengelikun Genturung Pendiau (JKKK) nyengkaum serakup ba sitak Selangau.
“Kelimpah ari nya, mega bisi diatur pengawa nyuaka Pala Tanah Seksyen 6 Kanun Tanah Nengeri (KTN) ngagai 22 penerima ungkup kandang menua Dijih, Selangau enggau Ulu Mukah,” ku iya.
Gira madah ngagai peranak ti nerima Pala Tanah Seksyen 6 KTN nganjung peminta ngagai Opis Tanah enggau Survei (JTS) ngambika nyukat tanah ungkup lot individu ari baruh Seksyen 18.
“Tu siti ari pengawa Perintah Gabungan Parti Sarawak (GPS) kena negika hak rayat Sarawak nengah chara nyukat tanah NCR ngambika hak ba tanah nya terus diintu enggau pemisi pala tanah ke sah,” ku iya.
Kelimpah ari nya, Gira mega udah bejadika taba baru Rumah Oyok, ke panjai 16 pintu ba Jalai Dijih.
“Belanja sepenyampau RM75,000 mega diberi kena meli perengka dikena ngaga rumah panjai enggau bantu sepenyampau RM16,000 ngagai JKKK rumah panjai,” ku iya.
Iya minta ampun laban enda ulih ngabas peranak Rumah Jangau di Tepus, Balingian laban gaya hari ke enda manah.
“Ketegal gaya hari ke enda manah, penerebai ngena helikopter ngagai rumah panjai nyaenda ulih diteruska,” tambah Gira.
Bela bisi datai maya nya, Senator Rita Serimah Patrick Insol, Sekretari Politik Kepala Menteri, Edwin Banta enggau Pemesai Pelilih Menua Selangau, Henry Inting Nyami.