Anda di sini

Juluk Sarawak nyapai tikas penyulut 40% dalam STEM

Advertisement
 Manyin (duduk, tengah) nerangka pasal penyulut STEM ba kededua sekula di Kuching. Sama bisi, Jamiran (duduk, kiri) enggau Ravi (duduk, kanan) enggau pemesai ari IPGKBL. — Gambar Muhammad Rais Sanusi
NGEMANSANGKA STEM: Manyin (duduk, tengah) nerangka pasal penyulut STEM ba kededua sekula di Kuching. Sama bisi, Jamiran (duduk, kiri) enggau Ravi (duduk, kanan) enggau pemesai ari IPGKBL. — Gambar Muhammad Rais Sanusi

KUCHING: Sarawak ngarap amat ulih nyapai tikas penyulut 40 peratus dalam Pembelajaran Sains, Teknologi, Kejuruteraan enggau Matematik (STEM) ba semua sekula primari enggau sekondari dalam timpuh dua ngagai tiga tuan ke deka datai.

Menteri Pelajar, Sains enggau Pemansik Teknologi Dato Sri Michael Manyin Jawong madahka, peratus nya semak enggau juluk nasional di serata Malaysia, iya nya 60 peratus.

Nitih ku iya, ba taun 2020 nembiak Sarawak teulihka pemujur 23 peratus dalam STEM dibandinngka enggau taun nyin kemari, semina 21 ngagai 22 peratus.

Taja pia bepelasarka penyampau nya ku iya , semina 23 peratus nembiak ke ulih tama kelas Sains Tulen ba Pom 4 pengudah Pentaksiran Tingkatan Tiga (PT3).

"Peratus tu mesti lebih ari 23 laban enti enda niki, peratus nembiak ba Pom 6 engka kurang sereta lebih mimit agi enti nyema nembiak tama ke univerisiti.

"Nya kebuah juluk kami entara dua ngagai tiga taun endur nyapai 40 peratus pemutus ti nyulut nya ungkup nembiak Sarawak dalam STEM," ku Manyin.

Iya mansutka pekara nya ba aum pengarang berita ti diatur ba opis iya di Begunan Baitulmakmur, pengudah nyadi chairman aum enggau Institut Pematih Pengajar Kampus Batu Lintang (IPGKBL) bekaul penerang pemadu baru pasal penyulut STEM enggau pelajar Inggeris ba sekula primary.

Ku iya, tuju Sarawak ngemeratka pelajar STEM laban nengeri tu ti semina ngena Jaku Inggeris kena ngajar Matematik enggau Sains ba semua sekula primari, berengkah taun tu.

Ngenang bekaul enggau ngelatih baru pengajar ti ngajar STEM, Manyin madahka perintah udah melanjaka RM10 juta ungkup Institut Pematih Pengajar kena ngelatih urung 2,000 iku pengajar ba nengeri tu sereta belanja nya mega dikena meli kereban, model enggau kebukai.

"Semua tu dipejalaika Opis Menteri pelajar Malaysia (KPM) enggau ungkup belanja ari Sarawak. Aku amat gaga laban KPM amat nyukung kami 100 peratus kena bejalaika pengawa ngajar enggau belajar Sains enggau Matematik dalam Jaku Inggeris (PPSMI) taun tu.

"Taun baru, engka silibus dalam Jaku Inggeris deka dilanjar nyentuk ngagai Pom 5 enggau nengeri tu engka patut ngungkupka entara RM7 juta ngagai RM8 juta tiap taun ngambika terus nyukung kereban nya enggau pengajar," ku iya.

"Kelimpah ari nya, direktor IPGLBL Jamiran Salam madahka naka ke diatu IPG nya udah bejalaika projek perintis STEM ba dua buah sekula taun nyin kemari enggau taun tu iya nya SMK Tebedu enggau SMK Matang Jaya.

"Kami mai teknologi moden ti disukung Universiti Tenaga Nasional (Uniten) enggau Sarawak Energy sereta kami bekerejasama bekaul enggau model kolaborasi.

"Kerejasama tu, sepenyampau RM100,000 diungkupka kena bejalaika projek ba kededua bua sekula nya sereta enggau nengah Opis Menteri Pelajar, Sains enggau Pemansik Teknologi Sarawak, bisi 20 buah sekula bukai di Sarawak ti bulih penguntung ari projek tu berengkah taun baru enggau taun ke bukai," ku iya.

Lalu 20 buah sekula nya ku iya, nyengkaum tiga (3) buah sekula primary enggau 17 buah sekula sekondari.

Naka ke diatu ku iya, sekula ke bulih penguntung ari program tu benung nagnti sukung ari Opis Pelajar Nengeri Sarawak.

"Kena ngerembaika program tu, kami enda ulih bepanggai ba Uniten enggau Sarawak Energy aja. Nya alai, kami nunjuk ngagai iya (Manyin) model kami kelimpah ari mantaika ungkus ke betul ungkup 20 buah sekula tu ngagai opis menteri nya sereta bakani sida ulih nyukung kitai," ku iya.

Sama bisi datai, Penyelaras STEM IPGKBL Ravi Gopal, kepala pengajar SMK Tebedu, Disin Nyaon, enggau pemangkukepala pengajar SMK Matang Jaya, Anita Hasbi.

Advertisement