Anda di sini

Bukit Tuchung Resak palan belajar nengah chara 'online'

Advertisement
 Bala nembiak benung ngaga kereja ke diberi pengajar nengah chara online, ti seraya bisi disempulang apai indai.
PELAJAR KUNCHI PEMUJUR BA PENGIDUP: Bala nembiak benung ngaga kereja ke diberi pengajar nengah chara online, ti seraya bisi disempulang apai indai.

KUCHING: Penyauh urung tiga kilometer enggau dua  jam lebih bedarat ngulu sungai sereta niki bukit enda nagang penyinu enggau pengeran ati Pengajar Sambau Dugat ngulu nembiak sekula ba Rumah Panjai Nanga Sumpa, Lubok Antu  belajar chara 'online' ngena arus internet ke bisi ba Bukit Tuchung Resak.

Nitih ku Sambau, nembiak sekula ba Rumah Panjai Nanga Sumpa nya betapi enggau penanggul nadai arus internet ti ngujungka sida iya ngulihka arus internet ba Bukit Tuchung Resak.

COVID-19 ti agi nyadi di menua tu ngujungka Opis Menteri Pelajar Malaysia (KPM) ngaga pemutus nangguhka sekula tumu ari ke udah ditetapka kena nyeliahka pandemik nya ngerampit nembiak sekula, ti lalu ngujungka mayuh silibus subjek enda ulih ditembuka.

Berindik ari pekara nya Sambau madah, nembiak enggau pengajar diperansang bejalaika sesi PnP (Belajar enggau Ngajar) ngena chara online, ti engka mayuh meri penanggul ngagai nembiak di menua pesisir laban ti nadai tauka enda bulih arus internet ti manah, enti dibandingka enggau sida ke di mengeri.

Ku Sambau pengajar ba SMK Lubok Antu, penanggul  belajar ngena chara online nya mega ditapi 14 iku  nembiak sekula primari enggau lapan iku nembiak sekula sekondari ba Rumah Panjai Nanga Sumpa, Lubok Antu laban rumah panjai nya agi tinggal ari bungkur arus internet.

Taja pia ku iya, penanggul nadai arus internet ba rumah panjai enda nagang pengeran enggau pengeransing bala nembiak deka ngulihka pemandai, iya nya ke sebedau tu mega suah udah ngelawa bukit Tuchung Resak ngiga arus internet ngambika ulih belajar nengah chara online.

"Nadai arus internet penanggul besai ba rumah panjai kami. Sinu meda bala nembiak rumah panjai kami (Nanga Sumpa, Lubok Antu) ti nadai ulih belajar sereta bulih penerang ari bala pengajar sida ketegal nadai arus internet.

"Nya alai ngambika ulih belajar nengah chara online, kami bedarat penyauh urung tiga km, iya nya bedarat nguluka sungai  urung 45 minit sereta niki bukit urung sejam setengah, baru datai ba bukit Tuchung Resak ke bisi arus internet, ti dipelabaka kena panchar ari Tekad Batang Ai.

"Tu semina penemu sereta chara aku pengudah suah meda sida ngelawa bukit nya ti ditemu bisi arus internet. Nya kebuah aku mai sida iya ngiga penerang betanya dalam 'WhatsApp Group' sekula enggaika sida tinggal ari orang, laban nembiak bukai ti semak enggau sekula ulih belajar nengah online sereta nerima penerang ari pengajar," ku iya madah ngagai Utusan Borneo.

 Bala nembiak bedarat ngulu sungai 45 minit sereta niki bukit sejam setengah ngelawa bukit Tuchung Resak.
GAGIT: Bala nembiak bedarat ngulu sungai 45 minit sereta niki bukit sejam setengah ngelawa bukit Tuchung Resak.

Jalai alun ti bedau datai ba rumah panjai ku Sambau, mega siti ari kebuah bala nembiak Rumah Panjai Nanga Sumpa enda bulih penerang nyengkaum kereja sekula ke diberi pengajar.

"Deka ngelawa rumah panjai kami agi ngena perau. Diatu kami nadai perengka pengangkut ke ulih ngenyampatka pejalai kami sereta beungkus murah (belanja perengka pengangkut)," ku iya.

Dalam betapi enggau penanggul ti baka tu ku Sambau, iya seruran meri peransang ngagai bala nembiak nya ngambika bebendar belajar sereta ngiga penemu laban mayuh silibus ti bedau dipelajarka.

Ku Sambau, iya deka meda nembiak rumah panjai nya ngambika ulih setipak sereta sama bulih penemu baka  nembiak bukai ke diau di mengeri.

Ku iya madah, kelimpah ari nembiak bala apai indai mega ransing sereta tetap meri sukung ngagai anak ngulihka pemandai sereta belajar ngena chara online taja pan bedarat jauh ngiga arus internet.

"Sukung enggau peransang ari apai indai chukup manah. Sida empu mega sanggup nguluka anak sida niki bukit, ngema bekal enggau ai ke anak sida iya," ku Sambau.

Kena 15 November, aktiviti ti dipejalaika Sambau begulai enggau nembiak ari rumah panjai iya enggau Nanga Jambu bisi dikerembaika ba 'page' Facebook Nanga Sumpa, Lubok Antu, Sarawak, sereta bulih timbal ari netizen.

  • oleh
  • Advertisement