KUCHING: Michael Tiang ukai orang ke patut nyaraka penemu bekaul Rang Undang-undang (Ubah), laban nya padan entara dua presiden parti.
Nembiak Parti Sarawak Bersatu (PSB) madah, Rang Undang-undang (Ubah) Konstitusyen Nengeri bedau lama, udah dikemendarka dalam aum Kunsil Nengeri (DUN), nya alai semina pengaga undang-undang aja patut nyaraka nya.
“Iya pengari ti dipilih pengundi tauka ukai?
“Tauka pengaga undang-undang di nengeri tu? Enti ukai...iya nadai pematut nerima tanggi nyaraka Rang Undang-undang (Ubah) nya,” ku iya.
“Semina kaban DUN ke mulia aja patut lalu ukai sebarang bagi orang di luar DUN,” ku penerang nya.
Sekretariat Nembiak PSB ngenang sentang juluk ati Sekretari Nembiak Parti Rakyat Bersatu Sarawak (SUPP) Michael Tiang, ti nerima tanggi Presiden PSB, Dato Sri Wong Soon Koh, nyaraka penemu sentang Rang Undang-undang (Ubah) nya.
Ku Tiang, iya ngarika Presiden SUPP Dato Sri Dr Sim Kui Hian nerima tanggi nyaraka penemu sentang pematut peranak menua Malaysia ti enda diada di Sarawak nyadi kaban DUN.
PSB nambah, presiden parti sida deka nyaraka pekara nya enggau Dr Sim, kena nerangka empas ari ubah konstitusyen nya ngagai Sarawak, laban nya meri empas ke chukup besai ngagai rebak dudi di Sarawak.
“Nya alai, sesiku ari raban pengaga undang-undang nengeri patut ngambil bagi ngambi nerangka ubah konstitusyen nya,” ku sida.
“Pengundi enggau rayat bisi hak mendingka mayuh agi sada tauka penemu bekaul rang undang-undang nya enggau silik agi, lalu ukai ngelalaika pekara nya ari sida,” ku sida.