KUCHING: Opis Bomba enggau penyelamat Malaysia (JPBM) Nengeri Sarawak seruran nyikap diri napi penusah ampuh bah maya musim monsun timur laut ti dipelaba berengkah bulan November taun tu ngagai bulan Mac 2021.
Direktor JPBM Nengeri Sarawak, Khirudin Drahman madah, sekeda kandang menua barat nengeri tu engka napi penusah ampuh bah ti nyadi ketegal ai pasang besai.
“Dipelabaka sekeda kandang menua muak ke barat nengeri tu baka Sebuyau, Simunjan, Serian, Samarahan enggau Siburan enggau kandang endur ngelingi tebing tasik napi penusah ampuh bah ketegal penyadi ai pasang besai.
“Muak ke utara iya nya Lawas, Limbang, Miri enggau Lembah Baram naka ke diatu nadai kena penusah amapuh bah sereta gaya hari manah.
“Mensia mayuh anang irau laban kitai ngembuan aset ti chukup sereta efisyen,” ku iya.
Iya mansutka pekara nya ba aum pengarang berita bekaul enggau Penyikap JBPM Nengeri Sarawak napi monsun timur laut, ti diatur ba Balai Bomba enggau penyelamat Tabuan Jaya ditu, kemari.
Nitih ku iya, JBPM Nengeri Sarawak bisi 1,194 iku Pemesai Mendam (PSM) tsedia bejalaika pengawa matau, operasyen nyelamat enggau meri penerang.
Nambahka nya, JBPM Nengeri Sarawak dibantu Pemesai Bomba Bantu (PBB) bisi 230 iku, Tim Bomba Volunteer - PBS (2,259 iku), Bomba Komuniti (7,453 iku), Pasukan Tindakan Kecemasan Komuniti - CERT (10,107 iku) enggau Summer Camp bisi 820 iku.
“Taja pia kami mega meruan begunaka kerejasama komuniti enggau mensia mayuh, dikena nentuka servis bejalai enggau lanchar,” ku iya.
Bekaul enggau Palan Ngenduh Sementara (PPS) di serata nengeri ba taun 2019 bisi 621 PPS sereta dipelabaka deka nambah taun tu.
Nambahka nya aset injin ti nyengkaum ba Balai Bomba Kuching, Sibu enggau Miri baka lori bisi 16 unit, utiliti 4x4 (67 unit), bot penyelamat (45 unit) bilun engkabang (seunit).
Berebak enggau tu iya madahka semua opsyerasyen nyelamat sida ke kena penusah bag deka dipejalai nitihka prosedur operasyen standard (SOP) ti ditetapka Ejensi Mutarka Penusah Ngenyit Menua (NADMA), Komiti Mutarka Penusah Ngenyit Nengeri Sarawak enggau Kaunsil Pengelikun Menua.
Iya madahka nya nyengkaum bisi nyendiaka sengkabung idung enggau mulut, pemeresi jari sereta seraka fizikal baka pemyauh orang ke diselamat sereta dibai dalam bot deka dikurangka.