KUALA LUMPUR: Bisi 1,020 buah sekula ti dikategori nyadi sekula repuk di Sarawak ke alai 415 buah ari nya endang udah balat endar repuk sereta patut digaga baru, pia ku siku Kaban Parlimen ari Sarawak kemari.
Ahmad Johnie Nawawi (GPS-Igan) lebuh ti nyara Rang Undang-undang Perbekalan 2021 di Dewan Rakyat madah, naka ke diatu bisi 433 buah sekula udah dikemanah lalu laluh 587 agi benung dipejalaika.
Berebak enggau nya, iya meri langgur penemu ngambika perintah meri ungkup belanja khas ke besa agi dalam Bajet 2021 kena mutarka penanggul sekula repuk enggau sekeda isu pelajar ke bekaul.
“Aku mega minta ngagai Opis Menteri Pelajar ngambika sekula repuk ti digaga (dikemanah) ila disikap enggau perengkaguna baka dewan alai makai, dewan alai begempuru, buding, kuarters pelajar enggau perengkaguna ke bukai,” ku iya.
Nitihka analogi iya, iya madahka ungkup belanja RM1 bilion semina ulih dikena ngemanah enggau nirika baru urung 133 buah sekula aja sechara pukul rata ninting taun.
“...ni naka pengelama isu laluh 587 sekula repuk nya ulih diputarka magang? Ba kira aku, nya deka begunaka timpuh urung lima taun, nya pan enti bisi bulih agih belanja RM1 bilion.
“Nyema Sarawak bulih agih belanja RM500 juta ninting taun, penanggul sekula repuk di Sarawak semina ulih diputarka dalam timpuh urung lapan taun, lalu enti RM250 juta setaun isu sekula repuk semina ulih diputarka dalam timpuh 16 taun.
“Aku irau amat ati sentang timpuh ke diambi kena mutarka projek sekula repuk di Sarawak enti trend agih belanja ari perintah Besai enda ditambah dalam tetiap bajet,” ku iya.
Ambika banding ba taun 2019 ku iya, Sarawak semina bulih RM100 juta ungkup sekula repuk ke alai nya semina kena ngaga 32 buah sekula aja, lalu ba taun 2020, Sarawak nadai nerima sebarang agih belanja ungkup sekula repuk.
“Dalam Bajet 2021, RM725 juta diungkupka ngagai Sarawak enggau Sabah kena ngangkatmanah begunan enggau infrastruktur 50 buah sekula repuk,” ku iya.
Berebak enggau nya, Rubiah Wang (GPS-Kota Samarahan) madahka tajapan mayuh ti bepenemu penambah agih belanja ungkup pemansang ngagai Sarawak sepenyampau RM100 juta iya nya ari RM4.4 bilion ngagai RM4.5 bilion dalam Bajet 2021 dianggap penambah mimit aja, tang pekara enda ulih dipeda dalam siti sukut.
Ku iya, perintah udah mulaika sekeda projek ke ngelama ti ditangguh kenyau dua taun ke udah baka projek ngangkatmanah Jalai Datuk Mohamad Musa ba Jalai 8,101 ngena belanja sepenyampau RM229 juta.
“Arapka pengawa tu nyadi titik pengemun nuju mulaika hak Sarawak sechara berenggat ba ke dalam Sempekat Malaysia 1963 nyengkaum mulaika kuasa dalam pekara bekaul pelajar, undang-undang, pengerai enggau ke bukai,” ku iya. — Bernama