KUCHING: Parti Sarawak Bersatu (PSB) nanggi Presiden Parti Rakyat Bersatu Sarawak (SUPP) Dato Sri Dr Sim Kui Hian besara penemu sentang ubah Konsitutsyen Nengeri Sarawak ti dikemendarka Dewan Kunsil Nengeri (DUN) kena Hari Empat nyin tadi.
Presiden PSB Dato Sri Wong Soon Koh madah, Dr Sim gaga amat ati mantaika ubah ti digaga Gabungan Parti Sarawak (GPS) nya seraya madahka nya mih ke pemadu manah ungkup Sarawak.
“Pengamat iya, nya ‘BLACK DAY’ ngagai Sarawak lebuh GPS ngubah konstitusyen nya ti ngemendarka individu ti ukai ada di Sarawak nyadi kaban Kunsil Nengeri (ADUN) tauka Kepala Menteri Sarawak.
“Enti Dr Sim enda pechaya enggau utai ti dipadahka kami, kami sedia besara penemu enggau iya sentang pengamat empas ubah ti dibantaika iya, enggau ati ti gaga nya,” ku iya maya aum media ba Indu Opis PSB ditu kemari.
Sama bisi enggau, sekretari besai parti George Lo enggau Kaban Kunsil Nengeri (ADUN) Ba’Kelalan, Baru Bian.
Tambah Wong, iya sinu ati laban orang baka Dr Sim enda meretika ubah ti digaga ba konstitusyen nya nyengkaum empas ngagai nengeri tu.
PSB ku iya nyemetak, enda mantah bagi keterubah Rang Undang-Undang (RUU) (Ubah) Konstitusyen Nengeri Sarawak, 2020 ke alai tikas umur chalun ke tau nyadi ADUN diturunka ari 21 taun ngagai 18 taun.
Taja pia ku iya, PSB bebendar mantah bagi kedua pekara dalam ubah RUU nya.
“Diterang enggau pandak, utai ke diubah ba konstitusyen nya udah mantaika klausa baru ti ngemendarka peranak Malaysia sekalika iya diada tauka enda di Sarawak,enti iya bisi siku ari apai indai ti diada di Sarawak lalu enti iya diau mendam di Sarawak, iya tau nyadi ADUN.
“Ubah tu nyata lalu sesapa enggau pemereti dalam jaku Inggeris patut nemu meretika nya. Aku sinu amat ati laban orang ke baka Dr Sim enda meretika nya,” ku iya.
Ditanya sekalika ubah konstitusyen nya deka nyadi isu maya pengawa bepilih nengeri ke deka datai, Baru madahka PSB semina deka ke rayat meretika kebuah parti mantah ubah nya.
Iya mega nyerah ngagai rayat beratika kediri empu sentang ubah nya.