KUCHING: Perintah Sarawak ngelanjarka diskaun bayar bil ai ngagai timpuh tiga bulan agi, ari Oktober nyentuk Disember 2020 ari baruh Pakej Bantu Khas Sarawakku Sayang (BKSS).
Menteri Utiliti Dato Sri Dr Stephen Rundi Utom nengah siti penerang madah, nya dilanjar pengudah berundingka empas pandemik COVID-19 ba rayat.
Ku iya, ari baruh inisiatif tu, ruang bilik enggau akaun domestik deka ngasaika diskaun 25 peratus, penguna komersial enggau komersial domestik ngasaika 15 peratus diskaun lalu penguna industri ngasaika diskaun 10 peratus.
“Tu deka meri pemaik ngagai urung 600,000 penguna ai di serata Sarawak. Ungkup timpuh ari 1 April nyentuk 30 September 2020, penyampau subsidi ari perintah Sarawak urung RM24 juta.
“Urung RM10 juta agi diguna ungkup timpuh ke dilanjar ari Oktober nyentuk Disember taun tu,” ku iya.
Opis Menteri ku Dr Rundi, deka majak c hakah gawa begulai enggau semua ejensi mekal ai iya nya Opis Bekal Ai Menua Pesisir (JBALB), Lembaga Air Kuching (KWB), Lembaga Air Sibu (SWB) enggau LAKU Management Sdn Bhd.
Kerejasama tu kena nentuka Sarawak enggau rayat iya bisi akses ngagai bungkur 100 peratus utiliti ti tau dikearap bekualiti, sikar sereta bisi pematut nyerumba taun 2025.