KUCHING: Orang indu patu diberi peluang bejalaika pengawa ba renggat nembiak redak nyadi ijin penyerakup nengah Biro Indu.
Kaban Kunsil Nengeri (ADUN) Pakan, Tan Sri William Mawan Ikom madah, Biro Indu bejalaika pengawa ke berat di rumah panjai enggau genturung pendiau di menua pesisir ba pengawa nyerakupka raban bansa.
Ku iya, orang indu ulih nyaup Komiti Pemansang enggau Pengelikun Genturung Pendiau (JKKK) ngatur rumah panjai enggau genturung pendiau kelebih agi ba pengawa ngatur ngatur aktiviti enggau program bepelasarka komuniti ke mungkur peranak di menua nya.
“Orang indu kemaya hari tu ukai baka orang indu ke suba. Orang undu diatu mayuh ke bepelajar,ngembuan peneleba sereta ngembuan kualiti ke tinggi nyadi ketuai.
“Sida patut diberi peluang sebaka enggau orang lelaki ngemansang sereta nyerakupka raban bansa ba renggat nembiak redak baka di rumah panjai enggau genturung pendiau,” ku iya.
Iya bejaku munyi nya maya bejadi Ngintu Penumbuh Biro Indu Rumah Asun, Marau Tengah, Pakan bedau lama udah.
Ku Mawan, jeman udah berubah, tanggungpengawa orang indu ba pemansang komuniti majak beguna lalu sida ukai semina diau ngintu ruang bilik aja tang mega berengkah ngaul diri ba sektor dagang ‘online’.
“Enti suba orang indu semina diau ba rumah, enti ke kebun pengawa sida mantun enggau ngetau padi tang diatu semua nya berubah, orang diatu mayuh udah ngaul diri dalam bidang ke sebedau tu ti semina dikereja orang lelaki.
“Dalam politik, orang indu mega regas,” ku iya seraya madahka orang indu kemaya hari tu enda ulih agi ditagang ari aktif dalam bemacham bidang.
Ku Mawan, Biro Indu patut ngatur mayuh agi program enggau aktiviti ti ulih ngerapitka agi penyerakup ba peranak menua ditu.
Iya mega meri langgur penemu ngambika Biro Indu ngatur program ti fokus ngagai pengawa ngubah komuniti lalu nentuka nadai siku pan sida ditinggal.
“Rega penyerakup engagu seati ba rebak ke diatu majak kurang. Tu nyadi ketegal bida ba penemu ti ngujungka raban bansa pambar.
“Penatai raban orang tauka individu ti ngachuk runding sereta meri imej ti enda manah ngagai perintah, dalam konteks Sarawak perintah GPS (Gabungan Parti Sarawak) deka ngemarka situasyen.
“Enti utai ke digaga nya semina ketegal pemerat individu,nguntungka raban tauka sekeda parti politik, rayat deka pambar,” ku iya.
Ku Mawan baru, pandemik COVID-19 ti nyadi di dunya diatu nambahka agi tanggungpengawa Biro Indu.
Sida ku iya, patut nyaup perintah nyeridi mensia mayuh sentang prosedur operasyen standard (SOP) sereta ngemeranka ‘norma’ baru dalam pengidup ke nagang pengelekai COVID-19 di menua pesisir, ke diatu agi dikategorika nyadi Zon Gadung.
“Nya alai aku ngelalau rumah panjai tauka genturung pendiau ti bedau numbuhka Biro Indu, jampat mih numbuhka nya.
“Aku deka mantu ari sukut geran kena bagi numbuhka nya kena nentuka tetiap rumah panjai enggau genturung pendiau ba sitak Pakan kelebih agi Biro Indu,” ku iya.
Sama bisi maya nya, Pemesai Pengatur Pengawa Nengeri Pelilih Pakan Dana Ungki, Penghulu Dandan, Penghulu Ting Tiu Look enggau Chairman Biro Indu Rh Asun Sylvia Jawa.