Anda di sini

COVID-19: Sarawak ngerikodka empat kes positif kemari

Advertisement

KUCHING: Sarawak ngerikodka empat kes positif COVID-19 kemari lalu semua kes nya ditemu ba Pelilih Menua Kuching, ti nyadika penyampau kes niki ngagai 1,040 kes.

Komiti Mutarka Penusah Ngenyit Nengeri Sarawak (JPBNS) madahka, ari penyampau kes baru nya, tiga kes ngembuan kontak semakenggau kes positif ti udah diripot sebedau tu.

Nitih ku penerang nya, semua kes udah beperesa kali kedua ba fasiliti pengerai perintah nengah pengawa nyidi kontak ngagai kes positif COVID-19.

“Kes 1,037 enggau 1,038 iya nya diri sebilik lalu kontak semak serumah enggau kes 918 ti udah diripot kena 3 November 2020. Kes tu bisi kaul enggau Kluster Greenhill, Kuching.

“Kes 1,039 iya nya bakih sereta kontak semak ngagai kes 947 ti diripot kena 6 November 2020. Kes tu bisi batuk sereta tabin kena 6 November lalu ngembuan kaul enggau kontak positif ari baruh Kluster Wisma Saberkas,” ku JPBNS dalam penerang media kemari.

Komiti nya nambah, semua kes tu udah dipasukka ngagai wad isolasyen ba Sepital Besai Sarawak (HUS) ngambika diperubat.

“Pengawa nyidi kontak semak ke bukai ti bekaul enggau kes tu benung chakah dipejalai,” ku iya.

Beserimbai enggau nya, siti agi ari empat kes ti ditemu ba Pelilih Menua Kuching, ku JPBNS, iya nya ngaul kes meresa individu ti ngembuan simptom COVID-19.

“Kes 1,040 iya nya siku lelaki peranak menua tu ti udah beperesa COVID-19 laban ti bisi tabin, lelak lalu pedis pala kena 14 November 2020.

“Kes tu iya nya siku pekereja ba sebuah kompeni peribit ke diau ba buding ti disediaka kompeni nya. Iya udah diperubat ungkup simptom nya lalu udah beperesa COVID-19 ba sebuah Klinik Pengerai kena 14 November 2020 lalu pemutus rT-PCR kes tu ditemu positif kena 15 November 2020,” ku iya.

Ku JPBNS agi, kes tu enda ngembuan sejarah ngelawa menua luar tauka ngagai kandang menua ti bisi risiko tinggi kena rampit COVID-19 ba luar Sarawak.

“Kes agi dipansik enggau silik lalu pengawa nyidi kontak ngagai kes tu benung chakah dipejalai. Kes tu mega bedau ulih dipadahka bisi kaul enggau sebarang kluster ke udah bisi lalu kes tu dalam kategori kes kena rampit di kandang menua,” ku iya.

Beserimbai enggau nya, Opis Pengerai Nengeri Sarawak udah madahka Kluster Bah Arnab ba Kuching udah ditukuka tembu, kemari.

Nyentuk 15 November 2020, bisi 72 iku udah diperesa ke alai 12 iku udah ditemu positif COVID-19 nyengkaum kes indeks lalu 60 individu agi negatif.

“Tu nyadika tikas kes positif ungkup kluster tu iya nya 16.67 peratus lalu semua kes ti ngaul kluster tu udah gerai lalu pansut ari sepital. Nadai kes mati diripotka ti ngaul kluster,” ku penerang nya.

Berindik ari Kluster Bah Arnab ti udah tembu, semina lima kluster ke agi aktif di Sarawak iya nya Kluster Greenhill, Kluster Wisma Saberkas, Kluster Jalai Abell, Kluster Baki, Kluster Seladah ti semua tu ba Pelilih Menua Kuching.

Advertisement