MIRI: Pengawa nirika Palan Main Asal Orang Ulu enggau Indu Opis Gempung Gerempung Orang Ulu Sarawak, Malaysia (FORUM) deka berengkah dalam timpuh ti enda lama agi.
Presiden ke mega Kaban Kunsil Nengeri (ADUN) Murum Kennedy Chukpai Ugon madahka, pengawa nirika begunana nya berengkah diatu pengudah mujur nyapai jaku setuju enggau pekebun di kandang menua endur taba nya didirika.
“Pekebun nya udah muka tanah nya kenyau ari 34 taun ti udah. Kitai meri besai terima kasih lalu gaga ati ngagai sida laban udah meri kitai kerejasama ti pemadu manah.
“FORUM udah ngemansutka surat peminta ngagai kompeni kena 8 Oktober taun tu tadi lalu timpuh projek nya digaga iya nya 18 bulan. Aku ngarapka projek tu ulih bejalai enggau manah lalu tembu nitihka timpuh ti udah ditetapka,” ku iya bedau lama ti udah.
Chukpai madah munyi nya pengudah nyuaka chek ex-Gratia ungkup utai tanam ngagai 10 pekebun ti udah muka tanah taba begunan Palan Main Asal Orang Ulu enggau Indu Opis FORUM ba Miri.
Sama bisi datai iya nya Sapit Presdien FORUM ke mega ADUN Telang Usan Dennis Ngau.
Ku iya nambah, taba pemesai lima ikar nya bepalan ba Jalai Kerbau lalu nyema nya tembu ila, deka nyadi sebuah ari palan ti ngemegahka komuniti nya.
Nya disikap enggau sebuah balai mayuhguna ke ulih endur ngengkahka 100 mija ba ringkat atas lalu ringkat baruh iya nya opis ungkup semua gerempung Orang Ulu ti udah numbuhka FORUM, indu opis kelimpah ari librari tauka galeri.
“Kelimpah ari begunan nya ti ngayanka motif Orang Ulu ke ditemu endang kaya enggau seni enggau main asal. Palan main asal tu deka nyadi ikon sereta ke tanda komuniti kami di Sarawak kelimpah nyadi palan endur narit ati ke baru ditu,” ku iya.
Chukpai madahka, taba nya udah dikemendar Kepala Menteri Datuk Patinggi Abang Johari Tun Openg kena taun 2017 lebuh ti ngerami iya ke nyadi kepala menteri.
Maya simposium Main Asal Orang Ulu kena taun 2018, Abang Johari udah madahka agih belanja sepenyampau RM25 juta kena ngaga begunan opis FORUM.
“Kami endang beterima kasih. Nya alai aku ngarika komuniti Orang Ulu meri besai pengaga ati ngagai Kepala Menteri enggau perintah nengeri ba penyiru sida sentang guna komuniti Orang Ulu,” ku iya.
Ku iya nambah, pengerami nasih tanah deka dipejalai dalam enda lama ahi lalu raban sida deka ngangauka Abang Johari bejadika nya.
Bisi semilan gerempung Orang ulu ti berejista lalu numbuhka FORUM iya nya Gerempung Berawan Sarawak, Gerempung Bisaya Sarawak, Gerempung Kayan Sarawak, Gerempung Nasional Kenyah Sarawak, Rurum Kelabit Sarawak, Gerempung Lakiput Sarawak, Gerempung Lun Bawang Sarawak, Gerempung Pemansang Tipun Penan sereta Gerempung Komuniti Bansa Saban Sarawak.
Entara aktiviti ke tebilng dipejalaika enggau sekeda nya udah direjista ba Kalinda Dagang Temuai Sarawak iya nya Pengerami Do Ledah (Gerempung Kayan Sarawak), Festival Main Asal Kenyah Sarawak, Pengerami Nukenen (Rurum Kelabit Sarawak), Pengerami Irau Aco (Gerempung Lun Bawang) enggau Pengerami Babulang (Gerempung Bisaya Sarawak).
“FORUM meransang tetiap gerempung ngambika ngatur program seni enggau main asal etnik sida empu ti nyadika program besai dalam nyaga enggau ngetanka nya ngagai nembiak rebak baru,” ku Chukpai.