Anda di sini

JKKK patut numbuhka Komiti Mit Khas Polis Komuniti

Advertisement
 Pesereta woksyop begambar ungkup kenang begulai enggau Jack (duduk tengah), Barayan (duduk kiba), Pemancha Gerosen Jubin (duduk kanan) enggau temuai ke bukai.
UNGKUP ALBUM: Pesereta woksyop begambar ungkup kenang begulai enggau Jack (duduk tengah), Barayan (duduk kiba), Pemancha Gerosen Jubin (duduk kanan) enggau temuai ke bukai.

BINTULU: Komiti Pemansang enggau Pengelikun Genturung Pendiau (JKKK) sekalika di rumah panjai tauka genturung pendiau dipinta numbuhka Komiti Mit Khas Polis Komuniti ti ulih megai tanggungpengawa mutarka penanggul ti nyadi dalam komuniti di kandang menua nya.

Residen Bagi Menua Bintulu Jack Aman Luat madah, nyema penanggul tauka tating penusah ti bisi nyadi ketegal COVID-19 tauka laban pekara bukai, nya deka ngemuntagka komiti tu bejalaika pengawa dalam siti tim ngeripot penanggul nya ngagai raban ba renggat atas ngambika aksyen tauka pengawa ti patut ulih digaga.

“Beberapa pekara ti bisi dikemeranka iya nya tikas pengulih komuniti, chara mutarka risiko kena tinggang penusah lalu ngangkatka komuniti nengah strategi ngurangka risiko lalu jampat bejalaika pengawa mutarka nya lebuh ti betapi enggau penanggul,” ku iya.

Iya madah munyi nya lebuh ti ngarika Menteri ba Opis Kepala Menteri (Integriti enggau Ombudsman) ti mega Kaban Kunsil Nengeri (ADUN) Jepak Datuk Talib Zulpilip dalam bejadika Woksyop Polis Komuniti Siri 2 Renggat Pelilih Menua Tatau ba Sebuah hotel tebilang ditu bedau lama ti udah.

Berindik ari nya, Skim Matau Volunteer (SRS) endang chukup beguna ba tetiap genturung pendiau mega patut numbuhka Pasukabn Bertindak Kecemasan Komuniti (CERT) sekalika ba genturung pendiau tauka di rumah panjai diri empu.

“Nyema enda ulih dipejalaika ba renggat genturung pendiau, nya alai CERT ulih ditumbuhka dalam siti tim ngambika ulih bejalaika tanggungpengawa nerenakka pemereti ati mensia mayuh bekaul ngemeranka ‘norma’ baru lalu berindik ari polisi sereta strategi ti deka nyeliahka penanggul,” ku iya.

Ku iya madah, bantu JKKK ba renggat baruh endang beguna nya alai ba kebuah nya penemu ti dikemisi pesereta dalam woksyop tu ulih dikearapka lalu dipraktikka ba kandang menua sida empu setipak enggau garis lalau Komiti Mutarka Penusah Ngenyit Nengeri Sarawak (JPBNS).

Iya mega minta ngambika sesebuah pelilih menua ti bisi nambah 20 kes ke lalu dipadahka Zon Kuning enggau sekeda pekara ti patut perintah atur dalam nentuka nya enda betukar ngagai Zon Mirah nyema bisi kes nyadi lebih ari 40 kes baka ti nyadi ba Kuching.

“Zon kitai (Bintulu) mengkang gadung tang bisi ga enda lama nyadi kuning, nya alai kitai patut bebendar nagang igi penyakit tu (COVID-19) ari berampit,” ku iya seraya madahka bekaul pematut ngena aplikasyen MySejahtera dalam komuniti sereta aplikasyen bukai baka COVIDTrace enggau QCommunity.

Beserimbai enggau nya, Pemesai Opis Pelilih Tatau Berayan Lenya madah, pengawa ngatur woksyop tu iya nya kena matih enggau mantaika bekaul enggau konsep polis komuniti setipak enggau jaku tangkan JPBNS.

Ku iya, pesereta ti enggau woksyop tu dikearap ulih bekunsi penemu ti diterima enggau peranak genturung pendiau di kandang menua sida empu.

Ku iya madah, woksyop nya kena ngenegapka tikas tanggungpengawa nyadi ketuai dalam ketuai komuniti, ketuai bansa, JKKK enggau NGO dalam komuniti ke lalu kena ngenegapka pemereti ati komuniti dalam nentuka pengelikun enggau pengelantang ‘Kita Jaga Kita’ sereta dalam ngemeranka ulah ti ulih megai tanggungpengawa enggau komuniti dalam komuniti.

Advertisement