KUCHING: Perintah Gabungan Parti Sarawak (GPS) enda bechiping ba pengawa ngungkupka belanja dikena bejalaika pemansang nyengkaum ba sitak ti diarika penyakal.
Sapit Kepala Menteri, Tan Sri Datuk Amar James Jemut Masing madahka, ungkup belanja pemansang diberi enda ngira bagi politik, bansa enggau jalai pengarap awakka sama ampit ngasaika pengelantang.
“Siti chara dikena nentuka (nadai bechiping) iya nya iar ke tisi bida politik kitai, tang patut lebih ngemeratka rayat kitaisereta ngaga penyambung ngagai kandang bendur ti pemadu begunaka (jalai).
“Kaban Yang Amat Berhormat Dudong lebuh ti bejurai kemari (ensanus) ba DUN tu minta perintah GPS ngambika lurus/betul (fair) maya ngungkupa belanja dikena bejalaika pemansang neyngkaum ba sitak ke diaruka penyakal. Au (Yes), kami betul/lurus (fair).
“Baka, bekaul enggau ngaga Jalai Sungai Bidut-Tutus-Sebedil-Kampung Bungan Kecil diteruska sepenyauh 32 km ti meraka DUN Bawang Assan ti beungkus RM340 juta, taja pan sitak tu ari baruh PSB (Parti Sarawak Bersatu),” ku iya ti mega Menteri Infrastruktur enggau Pemansang Penyangkai Kapal.
Masing nerangka pekara nya lebuh ti nyimpul jurai opis menteri iya ba hari kepenudi Aum Kedua Penggal Kelima DUN Sarawak Ke-18 ti diatur ba Kompleks DUN ditu, kemari.
Penembu Jalai Sungai Bidut-Tutus-Sebedil-Kampung Bungan Kecil ti pemanjai 32 km nya ila, ku iya, penyauh pejalai ari tebing tasik ke menua ulu Sarawak deka ulih dikurangka/dipandakka.
Bejaku baru iya madahka, perintah GPS deka chara ngenyampatka pengawa enggau nembuka Penyambung Jalai Tebing Tasik (Coastal Road Network) enggau Jalai Besai Kedua memendangkan peranan stategik, impak positif enggau penguntung ari ngaga jalai tu ngagai raban bansa enti udah tembu.
Ari baruh program Penyambung Jalai Tebing Tasik enggau Jalai Besai Kedua, ku iya, bisi 13 buah jematan ti benung dalam mayuh renggat dipejalaika.
“Naka ke diatu, ari penyampau semua 13 jematan nya bisi 10 buah jematan udah ditinda sereta benung digaga, lalu lauh tiga jematan agi be renggat dokumentasyen iya nya bedau diputuska.
“Penembu projek Jalai Tebing Tasik tu, potensial ekonomi ba kandang tebing tasik kitai ulih disungkakka agi sereta meri peluang ekonomi dalam pemansang betanam betupi enggau akuakultur dalam skala besai.
“Pengudah Jalai Besai Kedua tembu ti mungkur penyambung Jalai Tebing Tasik enggau Jalai Besai Pan Borneo kelimpah ari ngemandakka pejalai ari Sibu ke Kuching sepenyampau dua jam setengah, Jalai Besai Kedua mega deka muka tanah enggau palan pengentap pendiau Tanah Adat Bumiputra (NCR) ba entara Jalai Tebing Tasik enggau Jalai Besai Pan Borneo,” ku iya.
Kelimpah ari nya lebuh ti ngenang bekaul enggau pemesai guna pengelikun garis entara menua, Maing madahka, Bungkur Rentayan Jalai Pengelikun Garis Entara Menua (Border Security Road Network) ti sepenyampau 1.032km udah diperambu.
Jalai Pengelikun Garis Entara Menua tu diperambu berengkah ari Biawak ke Lubok Antu ti nengah bagi menua Kapit enggau Sungai Baram Hulu (upper baram) enggau udah nya ke Bario sereta pengujung disambung ke Sarawak-Sabah Link Road.
“Penembu Jalai Pengelikun Garis Entara Menua deka meri awak ngagai kitai nyaga enggau ngelindung aset kitai ti berega bebilion baka Paip Gis Sarawak-Sabah enggau empat tekad bekal kuasa hidroelektrik iya nya Tekad Bakun, Murum, Baleh enggau Batang Ai, ti semua nya semak enggau garis entara menua kitai enggau Indonesia.
“Enggau ungkus belanja dipelabaka RM24 bilion, opis menteri aku ngiga ungkup belanja ari perintah besai ari baruh Langgur Pemansang Malaysia Lumpar Ke-12,” ku iya.