KUCHING: Pemesai Opis Perintah Nengeri Sarawak nerima insentif khas sebulan setengah batang gaji tauka minima RM2,000 ari perintah Gabungan Parti Sarawak (GPS).
Kepala Menteri, Datuk Patinggi Abang Johari Tun Openg madahka, nya dikena perintah GPS beterima kasih ngagai tanggungpengawa enggau komitmen pemesai Opis Perintah Nengeri Sarawak dalam bejalaika kereja enggau tanggungpengawa enggau penuh profesional dalam menua betapi pemar diatu.
Ku iya, tanggungpengawa enggau komitmen pemesai Opis Perintah Besai mega sama dikeingatka.
“Berindik ari pekara nya, perintah GPS udah mutusaka mayar insentif khas sebulan setengah batang gaji tauka minima RM2,000 ngagai pemesai Opis Perintah Nengeri Sarawak, sereta deka dibayar sebedau ujung taun tu.
“Enda ditinggalka mega pemesai Opis Perintah Besai ti deka dibayar insentif sekali mayar RM500 dalam suku keterubah 2021,” ku iya.
Abang Johari madahka pekara nya lebuh ti nyimpul jurai bekaul enggau belanja 2021 nengeri ba hari kepenudi Aum Kedua Penggal Kelima DUN Sarawak Ke-18 ti diatur ba Kompleks DUN ditu, kemari.
Dulu ari nya iya madahka sepemanjai pandemik COVID-19, pegawai Opis Perintah Nengeri Sarawak enggau Perintah Bedsai ti nyengkaum lutur, indu misi, pekereja pengerai, raban uniform, Imigresen enggau raban terabai menua tauka pekereja rintai mua ke bukai gawa bebendar ketegal deka ngelindung rayat.
Nambahka nya bisi mega staf opis perintah ti kereja di ‘belakang tabir’, jauh ari panchar publisiti tang kereja bagas ba endur sida kereja, ku iya.
Kelimpah ari nya, bekaul enggau Belanja 2021 ke dibantaika iya, Abang Johari madahka belanja nya nuju roadmap ti mungkur nilai enggau aspirasyen rayat Sarawak, peluang ngagai semua, nyungkaka tikas idup enggau Sarawak dalam pemaik, pengelantang enggau pengelikun.
Iya madahka pekara nya ulih dijapai tang begunaka kerejasama rayat Sarawak ba pengawa nyungkak enggau ngemansangka ekonomi ti lebih tegap kelimpah ari besaup napi pemar.
“Aku amat pechaya nyadi rayat Sarawak ti besaup enggau bagas, aku chukup optimis pasal Sarawak jemah ila ari diatu.
“Aku arap bendar lebuh kitai beserakup napi pemar, kitai deka lebih tegap tauka manah ari sebedau tu. Aram kitai besaup, kitai deka maju, nempa peluang enggau nyadika Sarawak lebih tegap ari sebedau tu,” ku iya.