KUCHING: Kaunsil Penyerakup enggau Pengintu Tanah Sarawak (SALCRA) bekerejasama enggau Sime Darby Plantation Berhad ba pengawa ngemansangka SALCRA Transformation Roadmap 2025 (STR25).
Sapit Kepala Menteri ti mega Menteri Betanam Betupi Moden, Tanah Adat enggau Pemansang Mengeri, Datuk Amar Douglas Uggah Embas madahka, nya dikena ngangkatka pukul rata produktiviti enggau tikas penyikar operasyen.
“Dikena nambahka pukul rata produktiviti enggau penyikar operasyen, SALCRA diatu benung bekerejamsa enggau Sime Darby Plantation Berhad dikena ngemansangka SALCRA Transformation Roadmap 2025 (STR25).
“Entara inisiatif besai iya nya nambahka pukul rata asil per hektar ngagai 20 tan metrik, Tikas Ngemansutka Minyak (OER) ke 23 peratus sereta mega nyemakaka semua aktiviti pengawa dagang ngambika ulih meri untung,” ku iya.
Uggah madahka pekara nya lebuh ti nyimpul jurai Opis Menteri Betanam Betupi Moden, Tanah Adat enggau Pemansang Mengeri ba hari kepenudi Aum Kedua Penggal Kelima DUN Sarawak Ke-18 ti diatur ba Kompleks DUN ditu, kemari.
Bejaku baru iya madahka Opis Tanah enggau Survei udah besetuju meri kuasa ngagai SALCRA bejalaika sereta ngeyampatka pengawa nyukat ari baruh Seksyen 18.
Berindik ari pekara nya, SALCRA udah numbuhka tujuh tim survei sereta penyampau tim deka ditambah nyema bisi pematut, ku iya.
“Naka bulan Oktober 2020, bisi 655 surat pala tanah ari baruh Seksyen 18 udah disuaka ngagai pengempu tanah enggau penyampau bisi 68 lot disukat,” ku iya.
Nambahka nya iya madahka polisi baru mega bisi ditumbuhka ungkup semua kandang endur baru dikemansangka ngambika disukat kena ngeluarka surat pala tanah ari baruh Seksyen 18, dalam timpuh tiga taun pemansang.
Iya mega madahka SALCRA minta ungkup belanja sepenyampau RM200.63 juta ngagai perintah nengeri dikena bejalaika projek baru enggau projek ti diteruska.
Projek ke diteruska ti beungkus RM59 juta ti nyengkaum nanam baru sawit (10,989 hektar) enggau nanam baru (1,050 hektar) sereta penyampau diungkupka RM57 juta, enggau Lot Title Survey ungkup 1,965 lot (3,000 hektar) enggau penyampau ke diungkupka RM2 juta.
“Projek baru sepenyampau RM141.63 juta dikena nanam baru 3,000 hektar, nanam baru 4,422 hektar enggau ungkup Intensification of Estate Mechanisation dikena ngemanahka agi produktiviti estate enggau ngurangka penyempau pengereja pengawa,” ku iya.