KUCHING: Ungkus ngaga tetiap satu kilometer jalai alun ke dibelakin di Sarawak tau manggai RM12.5 juta, pia ku Menteri Muda Infrastruktur enggau Pemansang Penyangkai Kapal nengeri, Datuk Julaihi Narawi kemari.
Ku iya, ungkup jalai ke dibelakin ba tanah kerapa, anggar ungkus ngaga tetiap satu kilomenter iya nya entara RM5.7 nyentuk RM12.5 juta nitihka standard jalai.
“Ungkup jalai ke dibelakin (digaga ba kandang) bebukit enggau gunung, anggar satu kilometer jalai nya entara RM6.3 juta nyentuk RM10.7 juta nitihka bansa standard jalai,” ku iya maya sesi tanya saut aum Kunsil Nengeri (DUN) Sarawak ditu.
Ungkup jalai belakin ba atas tanah rata, Julaihi madahka anggar ungkus ngaga nya entara RM4.7 juta nyentuk RM10.4 juta tetiap satu kilometer bepanggai ba bansa standard jalai.
Julaihi nyaut tanya Abdul Yakub Arbi (GPS-Balingian) ke deka nemu ungkus ngaga satu kilometer jalai alun di Sarawak, ambika banding baka ba tanah kerapa, tanah rata enggau bebukit.
Berebak enggau nya, iya madahka perintah nengeri bela beratika pematut ngaga jalai penyambung ngagai lebih 6,000 palan pengentap ke betabur di serata nengeri, lebuh ke merambu ngaga jalai alun, kelimpah potensial muka kandang endur baru ke pengelantang penguna. — Bernama