KUCHING: Perambu Undang-Undang (RUU) Konstitusyen Nengeri Sarawak (Ubah) 2020 dikemendarka ba Kunsil Nengeri (DUN) kemari, enggau sukung majoriti pengudah dibantaika baru sereta dipejuraika.
Pengudah RUU nya ngubah Pekara 16 Konstitusyen Nengeri Sarawak, rayat Sarawak ti beumur 18 taun diatu tau ngundi enggau dipilih nyadi Kaban DUN dibandingka enggau 21 taun sebedau tu.
RUU ti dikemendarka nya mega netapka semina peranak asal Sarawak ti ada di Sarawak tauka rayat Sarawak ti ada di luar Sarawak enggau sekalika apai tauka indai sida rayat Sarawak tau dipilih nyadi ADUN.
Menteri Dagang Temuai, Seni enggau Main Asal Datuk Abdul Karim Rahman Hamzah lebuh mantaika RUU nya ba bacha kedua kali enggau ketiga madah, " Tuju RUU tu iya nya nurunka tikas penau nyadi ADUN ari 21 ngagai 18 taun.
"Tu kena nyemakaka Konstitusyen Nengeri Sarawak enggau ubah Pekara 47 (b) enggau Pekara 119 (1) (a) Konstitusyen Perintah Besai ti nurunka tikas umur ti tau dipilih nyadi Kaban Dewan Rakyat tauka ngundi ari 21 ngagai 18 taun.
Abdul Karim ti mega Menteri Nembiak, Lumba enggau Main madah, Pekara 16 Konstitusyen nitihka ungkup mandotori dalam Seksyen 5, Atur Lapan Konstitusyen Perintah Besai ti netapka penau nyadi ADUN.
Nambahka nya iya madah, ari baruh Pekara 16 Konstitusyen Nengeri Sarawak, siti ari penau dipilih nyadi ADUN iya nya, peranak menua enda tau enda peranak ke diaudia Sarawak kelimpah ari nitihka umur ke udah ditetapka.
"Taja pia jaku 'peranak ba nengeri tu' enda didefinisyenka sekalika dalam Pekara Lapan Konstitusyen Nengeri (Sarawak) tang leka jaku endur diau enggau peranak tetap ditentuka kort ti mai reti, barang sapa ti diatu ba sesiti endur enggau tetap kelimpah nadai dia sementara atau disengajaka.
"Perintah nengeri iran dalam reti ba pengawa akim dikena, enda ngira ukai rayat Sarawak ari nengeri bukai dalam (Malaysia) ke diau di nengeri tu ketegal bisi permit kereja sah tauka gawa enggau Perintah Besai tauka Polis tauka Soldadu, tau dipilih nyadi ADUN," terang iya.
Abdul Karim bejaku baru, dalam reti ba pengawa akim nya mega meri awak ngagai kaban politik ari nengeri bukai datai sereta diau sementara di nengeri lalu madah diri peranak nengeri tu.
"Perintah nengeri enggau orang ari luar Sarawak masuk champur dalam pekara kitai sereta bejalaika sebarang pengawa nentuka nasit nengeri kitai.
"Polisi besai perintah nengeri Sarawak iya nya, nentuka hak Sarawak mesti dijaga rayat Sarawak , lalu orang luar enda patut datai mai 'jenama' politik sida ti tau ngeruga penegap nengeri kitai, sereta ngeruga pemaik enggau pengelantang sereta penyerakup rayat," terang iya.
"Tang juluk manah perintah nengeri tu dipusinka penyakal ti nuduh ngasuh ati pedis, madahka Perintah Sarawak muka jalai ngagai ukai rayat Sarawak nyadi chalun sereta dipilih nyadi kaban DUN tu.
"Penyakal nguji nempa peragam ti salah ngagai juluk RUU tu nengah chara nyaruka reti ba ungkup bekaul enggau Akta Imigresyen, ti meri 'mandat' ngagai perintah nengeri ti bisi tagang ekseklusif ba penama enggau naydi peranak mendam di nengeri tu," ku iya.
Nya alai, iya narit pulai RUU nya ti dibantaika kena Hari Dua tu tadi, kena nyeliahka rayat saru enggau penerang penyakal sereta tuju kebendar ubah Pekara 16 Konstitusyen Nengeri Sarawak.