KUCHING: Laluh belanja dalam Bajet Nengeri Sarawak 2021 mandangka sistem ngaduka pekara wang ti dikemeranka Perintah Nengeri manah sereta mandangka penyikap silik perintah maya napi fasa pengudah COVID -19, pia ku Sekretari Besai Gabungan Parti Sarawak (GPS), Dato Sri Alexander Nanta Linggi.
Iya ke mega Sekretari Besai Parti Pesaka Bumiputera Bersatu (PBB) madahka bajet nengeri inklusif sereta nemban ba guna ke diatu, kelebih agi naya napi pemar ekonomi berindik ari pengelekai pandemik COVID-19.
Ku iya baru, nya mega ngengkahka Sarawak ba pelasar ke betul kena matak pemeranak puku antarabansa, kelimpah ngangkatka pengandal institusyen wang menua tasik ngaul diri dalam pemansang ba mayuh bengkah sektor industri.
“ Ba semua nya, Sarawak ngerikod laluh belanja (surplus) RM180 juta pengudah beratika pengulih ba asil RM10.012 bilion belanja RM9.832 bilion ti ulih meri empas positif ngagai pengawa negapka baru ekonomi nengeri enggau pengelantang rayat.
“Nya nyata mandangka pengulih Perintah Sarawak ari baruh iring Kepala Menteri, Datuk Patinggi Abang Johari Tun Abang Openg numbuhka siti langkar ekonomi ke tegap, taja pan betapi enggau mayuh bengkah penanggul berindik ari pengelekai COVID -19,” ku iya nengah penerang media kemari.
Nanta ke mega Menteri Dagang Dalam Nengeri enggau Pekara Penguna madah, atur Perintah Sarawak nyendiaka agih belanja ungkup opis bekuasa ngemansangka zon ari baruh Kaunsil Pemansang Koridor Zon (RECODA)baka Ejensi Pemansang Ulu Rajang (URDA), Ejensi Pemansang Tanah Tinggi (HDA) enggau Ejensi Pemansang Zon Utara (NRDA) endang amat dikeandalka.
“ Nengah nya, kitai bisi pengulih negapka peamnsang ba kandang menua ulu entigis enggau menua pesisir di Sarawak, ti setipak enggau juluk perintah nengeri ngerapitka seraka pemansang enggau sosio-ekonomi enggau kandang mengeri ” ku iya.
Ngenang silik sentang Bajet Nengeri Sarawak 2021, iya madahka nya mega mandang komitmen Kepala Menteri belama enggau rintai Kabinet GPS ti seruran nguji ngangkatka tikas pengidup rayat.
“Nya ulih dipeda nengah penyedia kereja nyukat tanah Adat Bumiputera (NCR), duit turu jali kena ngaga enggau ngemanahka rumah panjai sereta ngangkatmanah sekula repuk, kelebih agi di menua pesisir,” ku iya baru.
Tambah iya, pemintar bala ketuai GPS nyerungkai jalai pemansut duit baru, sereta disukung jalai pemansut ekonomi ke bisi diatu, udah mujur nambahka penatai pemisi nengeri ti tau dikena nyikap serata nengeri ngena perengkaguna baka jalai alun, ai beresi, elekterik enggau sistem telekomunikasyen.
“Pegawa nyendiaka perengkaguna infrastruktur nya deka muka mayuh agi jalai nyual produk ari nengeri tu nyengkaum ngagai renggat antarabansa.
“Ba timpuh ke sama mega ulih ngadaka mayuh agi orang dagang baru Anak Sarawak, kelebih agi ba raban biak nengah chara sida ngaul diri dalam sektor agro-tani enggau industri pemakai, ukai semina nangkup guna domestik, tang dagang eksport,” ku iya.