MIRI: Mensia mayuh di mengeri besai tu patut bekerejasama nagang pengelekai penyakit COVID-19 ngambika enda majak ngelekai lalu nambahka penyampau, ti pulaika pengelikun enggau pemaik semua peranak Miri enggau nengeri tu.
Presiden Serakup Teresang Dayak Ugik Jalit madah, mayuh empas ti ditapi peranak dituenti sida puntan nagang pengelekai penyakit nya.
“Pemadu nyata diatu, kitai meda sekula udah ditutup lalu kes positif majak nambah
“Miri sebedau tu Zon Gadung tang diatu nyadi Zon Kuning, nya alai anang mih kitai nganti zon tu betukar nyadi mirah, tang besaup mih mulaika Miri ngagai Zon Gadung baru lalu nyadi sebuah mengeri besai ke likun,” ku iya ditu kemari.
Ku iya, utai ti dikenangi serakup nya, iya nya enti kes majak nambah mayuh agi premis ditagang beroperasyen lalu mayuh mega lenyau jalai pemansut penatai pemisi kelebih agi ti nerima upah tauka begaji hari.
Ungkup pekereja begaji hari, Ugik ngelalau sida ngambika seruran nyendiaka diri napi sebarang gaya penyadi lalu bejejimat ngatur belanja diri enggau ruang bilik, berengkah ari diatu.
“Taja pan bisi bantu ke diberi tang nya enda umbas sereta nyamin penyukup barang ke diguna enti Atur Nagang Pemindah (PKP) diteritka.
“Nya alai, kitai mesti seati sereta besaup kelimpah ngasika prosedur operasyen standard (SOP) ti ditetapka Opis Menteri Pengerai ba pengawa ngelaban virus ti enda ulih dipeda kitai ngena mata kasar,” ku iya.
Ku iya, enti nadai kerejasama ari semua, penanggul tu enda ulih diputarka, nya alai aram mih kitai sama munaska COVID-19 nyentuk ke lengis.
Ku Ugik, semua orang beratka pengerai sereta ngembuan penyedar ke tinggi sereta nadai enda ibuhka pengelekai COVID-19 ti jampat amat ngelekai nya.
“Semampai nitihka gaya penyakit nya nengah surat berita enggau media ngambika kitai bela nemu ni naka pemalat engagu kandang endur ke diberi perati,” ku iya.