Anda di sini

Kerejasama, ‘ubat pemadu semitan’ kena menang ngelaban pandemik COVID-19

Advertisement
UGGAH
UGGAH

KUCHING: Kerejasama enggau penyereta ari semua genap serak mensia mayuh iya nya ‘ubat pemadu semitan’ kena menang ngelaban pandemik COVID-19.

Sapit Kepala Menteri, Datuk Amar Douglas Uggah Embas madah Komiti Mutarka Penusah Ngenyit Nengeri Sarawak (JPBNS) udah ngelangkar mayuh strategi kena ngangkatka pengulih Sarawak betapi enggau pandemik tu ke benung nyadi.

Nitih ku iya, nengeri tu belajar ari peneleba enggau chara mutuska rentayan COVID-19 baka Korea Selatan, New Zealand enggau Menua China ti ngena strategi “full-contaiment” iya nya terit, agresif meresa, nyidi, ngiga kontak, kuarantin enggau isolasyen ti mujur ngurangka krisis pengerai enggau ekonomi.

“Ngambika kitai mujur ngelaban pengelekai igi penyakit tu, kerejasama enggau penyereta genap serak mensia mayuh amat beguna.

“Lalu entara strategi ti udah dilangkar JPBNS (kena ngangkatka pengulih Sarawak betapi pandemik COVID-19) iya nya nambahka pengulih enggau kapasiti Opis Pengerai Nengeri Sarawak (JKNS) meresa, nyendiaka kereban makmal enggau penau penerit adat.

“Numbuhka Tim Special Contact Tracing Squad kena mantu JKNS ngiga kontak kes positif COVID-19,” ku iya ti mega Chairaman JPBNS, kemari.

Uggah mansutka pekara nya lebuh ti nyaut tanya ari Dr Hazland Abang Hipni (GPS-Demak Laut) bekaul enggau perambu strategik Sarawak betapi enggau penyakit COVID-19 enggau penyakit virus bukai jemah ila, ba aum hari kedua, Aum Kedua Penggal Kelima Kunsil Nengeri Sarawak Ke-18 ti diatur ba Kompleks DUN ditu.

Nambahka nya Uggah madah, komiti neritka atur sepemanjai garis entara menua kena nagang penama mai penyakit nyengkaum jelu.

Neritka Garis Lalau tama ke Sarawak nengah aplikasyen online EnterSarawak enggau E-Health Declaration Form enggau nyendiaka palan kuarantin, ku iya.

Ngenyakahka pengawa bekunsi penerang enggau penyedar pasal COVID-19 ti ulih ngeruga pengerai, ku iya, baka nengah media chelak, media elektronik, media sosial enggau licha ba renggat ke baruh.

“Strategi di atas nya mega ulih dikena napi tauka mutarka igi penyakit bukai jemah ila,” ku iya.

Berebak enggau tu Uggah madahka perintah nengeri udah merambu ngemanahka perengkaguna ba Sepital di Bau, Serian, Sri Aman, Betong, Sarikei, Kapit enggau Limbang kena ngubat pesakit COVID-19.

“Perambu tu udah dikenataika ngagai Kaunsil Pengelikun Menua (MKN) ngambi diperundingka perintah besai,” ku iya.

Kelimpah ari nya, Uggah madahka Makmal Molekular Perubat kena meresa rT-PCR udah digaga ba Sepital Besai Sarawak (HUS) sereta deka dikerembaika ngagai beberapa buah sepital perintah di nengeri tu.

Nitih ku iya, makmal nya deka dikerembaika ngagai Sepital Sibu, Sepital Bintulu, Sepital Miri enggau Palan Tungkul Ati  Sarawak.

“Kapasiti peresa (rt-PCR) dipejalaika ba HUS iya nya 1,000 peresa sehari, Palan Tungkul Ati Nengeri Sarawak (500 peresa sehari), Sepital Sibu (300 peresa sehari), Sepital Bintulu (200 peresa sehari) enggau Sepital Miri enggau kapasiti 400 peresa sehari.

“Ngena bantu belanja ti diungkupka perintah nengeri, pengawa ngaga sebuah Makmal Molekular Perubat baru di Sepital Limbang mega benung dipejalaika enggau kapasiti 200 peresa sehari,” ku iya lebuh nyaut tanya tambah ari Dr Hazland.

Bekaul enggau fasiliti perubat peribit ku iya, Makmal Perubat ke ulih bejalaika peresa COVID-19 ti udah diaku Opis Menteri Pengerai Malaysia iya nya Makmal Perubat, Borneo Medical Centre (BMC).

  • oleh
  • Advertisement