KUCHING: Dr Nuing Jeluing dipilih baru nyadi senator berindik ari ti nadai chalun bukai dibantaika maya aum Kunsil Nengeri (DUN) kemari.
Nama iya disadang Menteri Utiliti Dato Sri Dr Stephen Rundi Utom lalu disukung Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail.
Lebuh ti nyadangka baru nama Dr Nuing, Dr Rundi madahka Dr Nuing maya gawa nyadi kaban Dewan Negara, iya chukup regas ba pengawa ngelakuka pekara ti dikemerat, pengelantang pendiau enggau hak Sarawak.
“Maya ti gawa ba penggal keterubah, Dr Nuing udah ngayanka pengeregas ba pengawa ngelakuka pekara ti dikemerat, pengelantang pendiau enggau hak Sarawak.
“Timpuh tiga taun penggal keterubah servis iya deka tembu kena 10 Disember 2020, lalu nya alai aku meri perambu ngagai DUN ngambika nyiri baru Dr Nuing sepenggal agi,” ku iya ba aum DUN, kemari.
Ku Dr Rundi, Dr Nuing ti mega kaban Parti Pesaka Bumiputera Bersatu (PBB) ti chukup regas tauka aktif dalam politik.
Nambahka nya Dr Nuing mega bekas ketuai pemesai perubat Shell Malaysia Berhad kelimpah kala gawa ba sepital perintah kenyau ari taun 1996.
Berebak enggau tu ,pengawa nyiri baru Dr Nuing nya dipadahka Speaker DUN Datuk Amar Mohd Asfia Awang Nassar.
“Laban nadai chalun bukai, enggau tu aku netapka Dr Nuing Jeluing dipilih DUN nyadi Senator ungkup penggal kedua,” ku iya.
Sebedau nya, Sekretari DUN madahka Dr Nuing Jeluing ti dipilih kena 11 Disember 2017 deka abis timpuh iya kena 10 Disember 2020.
Ku iya, Yang di-Pertuan Agong udah madah ngagai Tuai Megai Menua ke alai berengkah ari 11 Disember 2020, deka bisi siti penuduk puang dalam kaban Dewan Negara iya nya maya pangku pengawa senator lalu Dr Nuing deka abis timpuh maya nya.
“Nya alai pengawa milih siku senator patut dipejalaika,” ku iya.
Nitihku Asfia, sida bisi nerima surat rasmi ari Dr Nuing kena 15 November 2020 ti madah penyanggup diri gawa nyadi senataor nyema dipilih baru.
Ba penggal kedua nyadi senator, Dr Nuing deka berengkah 11 Disember 2020 ngagai 10 Disember 2023.