KUCHING: Sektor dagang temuai enggau ngaga barang entara sektor ekonomi ke pemadu balat napi pemar di nengeri tu ketegal pandemik COVID-19.
Kepala Menteri Datuk Patinggi Abang Johari Tun Openg madah,pengusut dalam dagang temuai mega meri empas ngagai sektor servis bukai.
Bela kena empas iya nya perengka pengangkut enggau logistik, hotel enggau palan endur bemalam, dagang burung enggau runchit nyengkaum industri pemakai enggau ai irup.
“Ungkup semilan bulan keterubah 2020, penatai temuai bisi kurang ngagai 64.1 peratus berindik ari pejalai ke bisi tatak enggau pengawa nutup adan antarabansa.
“Sektor servis dipelaba ngerikodka pemansang negatif 1.4 peratus ba taun 2020 lalu industri dagang ctemuai dipelaba begunaka timpuh manah baru baka ke sebedau tu,” ku iya.
Iya madah munyi nya lebuh Bejuraika Bajet Nengeri Sarawak 2021 ba Aum Dewan Kunsil Nengeri (DUN) ditu kemari.
Ungkup sektor ngaga barang, Abang Johari madahka nya dipelaba deka kusut ngagai 6.9 peratus dalam taun 2020 berindik ari penanggul ba aktiviti pemansut sepanjai rentayan bekal global.
Tambah mega ku iya, firma betapi enggau penanggul beroperasyen ba kapasiti ke bisi tatak kelebih agi maya tiga bulan keterubah tempuh Atur Nagang Pemindah (PKP).
Dalam sektor ngelumbung, pemansang nya disadang bisi kusut ngagai 2.9 ba taun 2020 ti dikaitka enggau pemansut ke mimit minyak mata enggau gis asli.
“Aktiviti dalam sektor begaga mega tejanggal laban nyauka semua aktiviti diketu maya PKP.
“Mayuh firma enggau kunteriktor napi pemar ngasika penti enggau prosedur operasyen standard (SOP) COVID-19.
“Situasyen tu dipelaba belinsur manah lalu ungkup taun 2021 sektor tu dipelabaka ngerejista pemansang ke manah,” ku iya.
Ungkup sektor betanam betupi, nya dipelabaka deka kusut 1.5 peratus dalam taun 2020 laban dalam timpuh lima bulan keterubah, pemansut minyak sawit kusut ngagai negatif 2.1 peratus sebedau niki baru berengkah ari bulan Jun 2020.
Nengah pemisi pengelunggar maya perintah bekurung, industri minyak sawit berlinsur manah lalu masuk ngagai suku kedua taun 2020 disukung penambah nguna nya ba renggat global.