Anda di sini

GPS deka majak chakah gawa ke rayat enggau nengeri tu

Advertisement

KUCHING: Perintah Gabungan Parti Sarawak (GPS) enda gegilik sereta deka majak chakah gawa ke rayat enggau nengeri tu.

Kepala Menteri Datuk Patinggi Abang Johari Tun Openg madah, taja pan pengawa ke dipejalaika perintah ari baruh pegai iya balat dibantah sekeda raban orang, tang perintah GPS udah mandangka pengulih ngaduka pekara wang nengeri enggau chara ke manah.

Ku iya, perintah GPS mega udah mujur nambahka penatai pemisi nengeri.

“Kami deka majak ngiga chara mutarka sebarang pemar lebuh bejalaika pengawa.

“Pengawa numbuhka Aum Komiti Koordinasi Pemansang Nengeri (SDCCM) ti bechairmanka aku empu, siti ari chara kena mutarka penanggul ke bekaul enggau projek ke digaga,” ku iya.

Iya madah munyi nya lebuh bejuraika Bajet 2021 Sarawak ba Aum Kunsil Nengeri (DUN) kemari.

Ku Abang Johari baru, sida deka ngenanka perintah tu ngena semua pengering ke pemaik rayat enggau nengeri ti dikesayau tu.

Ku iya, perintah ke ari baruh pegai GPS deka mantu mantupka pengingin enggau juluk ati rayat nengeri tu.

“Tu mih ti ditegika ka kitai, sebuah perintah ti alai semua rayat Sarawak bepanggai sereta ulih dikearapka.

“Dalam barang bagi situasyen kelebih agi dalam timpuh COVID-19 tu, aku enggau bala bakih aku deka majakka agenda pemansang Sarawak sereta mega deka beratka pengelantang rayat,” ku iya.

Dulu ari nya, Abang Johari lebuh bejuraika perambu bajet nengeri ungkup taun 2021, madahka perintah GPS udah bejalaika lebih 100 insiatif dalam timpuh tiga taun setengah tu, ke mega kena ngamatka semaya enggau rayat.

Entara inisiatif enggau pemujur besai ke dijapai perintah GPS iya nya, negi sereta ngintu hak, pekara dikemerat enggau status Sarawak ari baruh Sempekat Malaysia 1963 (MA63).

Inisiatif bukai iya nya ngemansutka baru asil enggau ngemayuhka penatai pemisi Sarawak mnengah bejalaika chukai dagang sereta bejalaika Kar Kuing Ekonomi Digital Sarawak.

Inisiatif enggau pemujur bukai ke dijapai GPS nyengkaum numbuhka Kaunsil Multimedia Sarawak (SMA), Kaunsil Ekonomi Digital Sarawak enggau Palan Penyulut Teknikal Sarawak (CENTEX).

Inisiatif bukai nyengkaum ngemesaika bungkur bekal ai enggau elekterik kelebih agi ngagai menua pesisir, nyaga hak rayat ke ngempu nengah ngakun domain zon asal, numbuhka TV Sarawak, meri bantu duit ngagai sekula bantu perintah, ngemodenka perengka pengangkut mensia mayuh sereta numbuhka penyaga pantai Sarawak.

Advertisement