MIRI: Menteri Perengka Pengangkut Sarawak Datuk Lee Kim Shin ngarapka sektor perengka pengangkut darat enggau sungai nengeri tu sama dikemeratka dalam Bajet 2021 ti dibantaika kilah ensana.
Ku iya madah, ambika chunto nadai agih belanja dipadahka ungkup perengka pengangkut sungai ti diatu nyadi pun penatai pe,msi di Sarawak.
Pia mega ku iya, dalam Atur Pemansang Malaysia Lumpar ke-12 ari baruh Pemansang Infrastruktur Perengak Pengangkut, nadai dipadahka pemansang perengkaguna perengka pengangkut mensia mayuh nyengkaum Bus Rapid Transit (BRT).
“Nadai dipadahka dia agih belanja ungkup pemansang padang bilun kelebih agi pengawa ngangkatmanah enggau pengawa ngemesaika nya. Taja udah ditemu padang bilun di Kuching enggau Miri udah lebih ari kapasiti ti ditetapka.
“Berindik ari nya, opis menteri deka mai pekara tu ngagai menteri enggau sapit menteri ba Opis Menteri Perenga Pengangkut perintah besai,” ku iya dalam penerang lebuh ti ditanya bekaul Bajet 2021 kilah ensana.
Nitih ku Lee, spenyampau RM150 juta udah dikemendar ungkup servis bas ba Program Transformasyen Servis Bas Ngetu (SBST) ba Kangar, Ipoh, Kuala Terenganu ti lalu di sengkaum mega ke Johor Bahru, Kuching, Kota Kinabalu enggau Kuantan.
Ku iya, agih belanja nya dikemendar berapa taun ke udah tang udah lama betangguh kemaya bejalaika nya.
“Aku ngarapka taun nyin ila, kitai ulih nerima agih belanja ke sama ngambika nya ulih dipejalaika b Kuching,” ku iya.
Bejaku bekaul enggau nya, Lee madahka pengawa ngelanjarka enda ibuh bebayarka chukai dagang ungkup pengawa bebelika bas di menua tu nyengkaum ti bisi ‘air-cond’ pengelama dua taun berengkah ari 1 Januari 2021 nyentukka 31 Disember 2022 tu endang pemutus ti manah.
Ku iya, tu endang singkang ti manah dalam perambu bebelika mayuh agi bas nyengkaum bas ti bisi kuasa ti endang efisyen ungkup guna servis bas ngetu di Sarawak.
“Insentif ti dipadahka dalam bajet tu deka nyungkak mayuh agi kilang masang bas di Sarawak,” ku iya.
Ku iya nyemetak, semua Bajet 2021 tu mekuh dalam pengawa nagang pengelekai penyakit COVID-19 ti ngeruga pengerai mensia mayuh sereta ekonomi menua enggau serius.
“Tu endang bajet ke endang besai ti kala dibantaika. Udah tentu aku nerima manah strategi dalam ngada sereta ngetanka peluang gawa.
“Kelimpah ari nya, dalam nagang pengelekai COVID-19 tu endang dikemeratka kitai laban nya bekaul enggau pengelikun rayat,” ku iya.