MUKAH: Menteri Pengintu Pengelantang Pendiau Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah optimis enggai ulah ti bisi disiplin ari peranak Sarawak, pandemik COVID-19 ulih ditagang begulai.
Iya madahka semua rayat nengeri tu dipeda bisi nitihka Prosedur Operasyen Standard (SOP) ti udah ditetapka raban ti bekuasa naka ke diatu.
Gaya pengasi ngagai atur tu ku iya ulih dibandingka enggau Atur Nangang Pemindah Diteritka Agi (PKPD) di nengeri bukai.
“Aku pechaya enggau disiplin tu, kitai ulih mutuska rentayan kena rampit COVID-19 di nengeri tu,” ku iya lebuh ti bejaku ba pengerami bejadi Program Sepakat@Komuniti Pembudayaan Norma Baharu: Putuskan Rantaian COVID-19 di Dewan Kampung Senau, Oya kilah ensana.
Bekaul enggau Pengawa Bepilih Nengeri (PRN) sereta ‘norma’ baru, iya endang nyemetak madahka pengelikun rayat endang dikemeratka.
Berindik ari nya, semua Raban Pengawa Bepilih (SPR) mesti bejejaga kelebih agi nyema PRN dipejalaika dalam timpuh ti enda lama agi.
Iya pechaya enggau peneleba sida ngatur sekalika Pengawa Bepilih Mit (PRK) tauka PRN Sabah ti udah lalu, pengilap ti sama enda ulih nyadi agi.
SOP lebuh bekimpin, maya hari ngundi enggau ke bukai mesti dirintaika baru setipak enggau norma baru dalam belaban enggau COVID-19 tu.
Nyadi Ketuai Orang Indu Gabungan Parti Sarawak (GPS) Fatimah madahka diri endang seruran meri jaku tangkan ngagai tetiap pati orang indu parti dalam mantu pengundi lalu mesan sida bekaul enggau SOP ti bekaul.
“Kitai suah ngingatka sida ngena sengkabung idung enggau mulut, nyaga takah, mansang ngundi enda sekali mayuh enggau bemacham agi,” ku iya.
Sama bisi datai iya nya Direktor Opis Pemadah Sarawak Mohamad Sahrizan Putit, Pemesai Opis Pelilih Menua Mit Oya Zalina Sait enggau Ketuai Komuniti Mukah Temenggung Hendi Suhai.