MIRI: Sepital Miri sepital ti pemadu kisuk ba utara ngatur beratus peresa swab ninting hari ari Miri, Limbang, Lawas enggau Marudi.
Menteri Perengka Pengangkut Sarawak, Datuk Lee Kim Shin madah, kenyau bulan Mac nyentuk 22 Oktober, Sepital Miri udah bejalaika urung 33,000 Peresa Real-Time Reverse Transcription-Polymerase Chain Reaction (RT-PCR).
“Penyampau tu mungkur penyampau pengawa ti dipejalaika rintai mua nyengkaum ari lutur, indu misi, staf makmal kelimpah tukang nuchi ninting hari.”
“Pengawa tu majak mayuh enggau penambah kes dirampit pengelekai COVID-19 kemaya tu. Aku amat tusah ati meda rintai mua kelebih agi di Sabah, sida sikar gawa nyelamatka nyawa orang bukai,” ku iya madah ngagai pengarang berita pengudah bejadika pengawa beripai meresi kandang tasik Miri ti diatur Miri Hash House Harrier, kemari.
Berebak enggau nya, Lee ke mega Kaban Kunsil Nengeri (ADUN) Senadin ngelalau mensia mayuh ngambi ngasika prosedur operasyen standard (SOP) ti ditetapka enggau meri kerejasama kena ngurangka pengelekai igi penyakit tu.
Ku iya, ngasika SOP nyengkaum seraka sosial, ngena sengkabung idung enggau mulut, sanitasyen jari enggau suah nuchi jari beguna amat kena mutuska rentayan COVID-19.
“Lebuh semua ngasika pentin tu enggau ngemeranka SOP, kitai ulih nagang pandemik tu ari ngelekai,” ku Lee nyemetak ke mega menteri ti megai tanggungpengawa ba Komiti Mutarka Penusah Ngenyit Bagi Menua Miri.
Iya beterima kasih laban gaya ba nengeri tu kelebih agi ba utara Sarawak agi ulih dijaga berindik ari tusun atur perintah neritka pengawa meraka garis entara menua enggau mesti dikuarantin pengelama 14 hari ngagai tetiap rayat ke tama ngagai nengeri tu.
“Aku nerima sebana ari mensia mayuh ke alai anak sida ari Semenanjung Malaysia, Sabah enggau menua luar ke deka pulai ke Sarawak sereta minta dikemendarka enggau pengelunggar.”
“Ba aku, nadai ti diberi pengelunggar ari virus nya. Nya alai, nadai sapa ti deka dikelaung tauka bulih pengelunggar.”
Tambahka nya ku iya, semua ungkus kuarantin enggau peresa COVID-19 rayat Sarawak ditanggung penuh perintah nengeri.