SIBU: Projek pemansang infrastruktur di Kakus deka majak dipejalaika kena nentuka peranak ba pelilih menua nya ngasaika pemaik perengkaguna ti manah lalu ulih ngangkatka tikas pengidup sida ninting hari, ku Kaban Kunsil Nengeri (ADUN) Kakus Datuk John Sikie Tayai.
Nitih ku Sikie, kena mekal bekal ai beresi ngagai peranak menua pesisir di Kakus, perintah nengeri udah ngemendarka agih belanja sepenyampau RM15 juta kena bejalaika projek Sistem Bekal Ai Alternatif Sarawak (SAWAS) ungkup empat buah rumah panjai ba pelilih menua nya.
Ku iya, entara empat buah rumah panjai ti nerima projek tu iya nya Rumah Ado Bilong, Rumah Jeffery Kitup, Rumah Kiah enggau Rumah Jayan, ti deka dipejalaika enda lama agi.
Dalam taun nyin kemari, ku Sikie, urung 18 buah rumah panjai di Ulu Kakus udah bulih bekal elekterik 24 jam nengah projek Skim Bekal Elekterik Alternatif Menua Pesisir (SARES) Sarawak.
Nangkanka tu, iya madahka perintah nengeri diatu benung bejalaika projek ngemanahka jalai alun ari Nanga Kelebu ngagai Rumah Ado lalu dipelabaka tembu kena Januari 2021.
“Taun tu, Kepala Menteri Datuk Patinggi Abang Johari Tun Openg mega udah ngemendarka agih belanja RM7 juta kena ngemanahka jalai alun ngagai Rumah Edward, Rumah Tadong enggau Rumah Nanang,” ku iya lebuh ba Program Ketuai Begulai enggau Rayat ba Rumah Edwin di Nanga Rungan, Tatau empai lama.
Ba tuju ke sama, projek Bekal Elekterik Menua Pesisir (RES) beungkus RM14.3 juta ungkup peranak ba Rumah Achun enggau Rumah Ado udah berengkah dipejalaika kena bulan nyin kemari, lalu peranak rumah panjai nya deka ngasaika pemaik bekal elekterik 24 jam.
Ku Sikie nambah, semua tu udah nyata mandangka perintah nengeri chukup kiruh enggau pemansang peranak ba menua pesisir nyengkaum di Kakus.
“Nya alai, sukung ti tegap ari rayat ungkup Gabungan Parti Sarawak (GPS) deka ngujungka semua projek pemansang terus dipejalaika ba nengeri tu, kelebih agi ba kandang pelilih menua Kakus,” ku iya nyemetak.
Berebak enggau tu, Sikie mega ngungkupka geran projek mit pemansang menua pesisir (MRP) sepenyampau RM20,000 ungkup JKKK enggau RM5,000 ngagai Biro Indu rumah panjai nya.
Sama bisi iya nya Pemesai Opis Pelilih Menua Tatau, Calvin Ligong enggau Penghulu Lubon Kinchang.