BINTULU: Opis Betanam Betupi Bagi Menua Bintulu chakah negapka bidang pengawa betanam betupi sereta ngiri mayuh macham penemu ke bekaul enggau pengawa betanam betupi ngambi peranak ngembuan pengerindu ngaul diri kelimpah nambahka penemu sida kelebih agi peranak kandang menua pesisir.
Nya alai, pengawa ngatur ‘Agriculture Community Outreach Programme’ (AgriCOP) ungkup renggat keenam Kunsil Nengeri (DUN) N67 Jepak udah dipejalai nyentuk ngagai genturung pendiau ba tebing sungai Tatau iya nya di Rumah Pada Selan Kuala Annau Tatau kilah lemai, empai lama.
Bisi 120 iku pesereta ari lima buah rumah panjai ari Rumah Pada, Rumah Jumput, Rumah Empaling, Rumah Robert enggau Rumah John udah ngulu program ti dipenyadika Menteri ba Opis Kepala Menteri (Integriti enggau Ombudsman) ke mega Kaban Kunsil Nengeri (ADUN) Jepak Datuk Talib Zulpilip.
Ba jaku iya maya ba program nya, Talib ngarap program nya deka mengkang dipejalai dudi hari ila berindik ari pengawa nya mayuh meri penguntung ari sukut penemu dalam sektor betanam betupi ngagai peranak kelebih agi raban orang bumai, orang ke betupi enggau orang berikan di bagi menua tu.
Dulu agi ari tu, entara aktiviti ti dipejalaika dalam program nya baka kus teori enggau licha sentang program pemansang pengawa betanam betupi, berikan darat enggau agro pemakai.
Kandang menua Annau dipadah tebilang enggau pengawa nanam nanas lalu pekara diberi perati dudi hari ila iya nya ba pengawa nanam nyiur laban beguna amat bemacham utai tanam berindik ari dagang ungkup sektor betanam betupi maya diatu nerima mayuh peminta.
Ba program nya, Duit Turu Fasilitasyen Betanam Betupi (AFF) penyampau RM300,000 udah diungkup ngagai pelilih Tatau ba sitak baruh DUN N67 Jepak.