Anda di sini

COVID-19: Sarawak ngerikod 16 kes positif baru kemari

Advertisement
 Statistik pemadu baru kes COVID-19 di Sarawak naka Hari Minggu kemari.
RIKOD PEMADU BARU: Statistik pemadu baru kes COVID-19 di Sarawak naka Hari Minggu kemari.

KUCHING: Sarawak ngerikod kes positif baru COVID-19 dua lumur enggau 16 kes diripot kemari.

Komiti Mutarka Penusah Ngenyit Nengeri Sarawak (JPBNS) madahka ari penyampau nya, 15 kes diripot ba pelilih Kuching enggau siti kes ba pelilih Serian ti nyadika semua kes COVID-19 di Sarawak naka ke diatu 796 kes.

“Sehari tu (Kemari) bisi tujuh kes peresa ti pulai ari palan ke berisiko tinggi rampit COVID-19, tujuh kes ba pengawa peresa kontak semak lalu dua kes agi ditemu ari peresa ke bukai,” ku JPBNS nengah penerang kemari.

Nerang silik pekara nya, JPBNS madahka bisi tujuh kes udah ditemu nengah pengawa beperesa pulai ari palan ke berisiko tinggi rampit COVID-19 ti diklasifikasika nyadi kes Import B.

JPBNS madah kes ke-781, 782 enggau 787 iya nya dua iku indu enggau siku lelaki peranak menua tu bisi sejarah ke Selangor.

Kes ke-783 iya nya siku indu peranak menua tu ti bisi sejarah kala ngagai Sungai Petani, Kedah.

Kes ke-784 enggau 785 ku iya nerang, kededua kes tu indai enggau anak ti bisi sejarah ngulu pengerami melah pinang bala iya di Kuantan, Pahang.

Nangkanka nya kes ke-786 tu siku nembiak ti belajar ba institut pelajar tinggi di Kuala Lumpur.

“Semua kes ke-781 nyentuk kes ke-787 udah pulai ke Sarawak kena 14 Oktober 2020 ngena bilun ke sama lalu udah dipasuk ba palan kuarantin di Kuching.

“Pemutus peresa rT-PCR kali kedua kena 23 Oktober 2020 ditemu semua kes positif COVID-19. Kes udah dipasuk ngagai wad pengasingan Sepital Besai Sarawak (HUS) ngambi diperubat,” ku iya nerang.

JPBNS madahka bisi tujuh kes baru ditemu nengah pengawa nyidi kontak semak ngagai kes positif COVID-19.

Kes ke-788, 789 enggau 790 ku iya kontak semak ngagai kes Kluster Baki. Kes tu bisi sejarah kala ngulu gempuru diri sebilik begulai enggau kes-768 enggau 770 kena 4 ngagai 5 Oktober 2020.

“Kes tu iya nya diri sebilik ti mungkur laki, bini enggau anak ke sekula ba Sekula Sekondari Wira Penrissen.

“Nangkanka nya, kes-791, 793, 794 enggau 795 iya ny kontak semak ngagai kes Kluster Seladah. Tiga kes ngaul diri sebilik ngagai kes-771 lalu siti kes siku orang ti kala meli kuih ngagai kes-771,” ku iya.

Sentang kes positif ti ditemu nengah pengawa peresa ke bukai, JPBNS madahka dua kes ditemu iya nya kes ke-792 enggau kes-796 siku lelaki peranak menua tu suah ngelawa rumah panjai ke sama di Sematan, Lundu maya tetiap ujung minggu.

Kes tu ku iya peresa COVID-19 di sebuah fasiliti pengerai perintah di Kuching kena 23 Oktober 2020 laban bisi kontak ngagai kes ti positif RTK Antigen.

Pemutus peresa rT-PCR kena 24 Oktober 2020 tetemuka kes tu positif COVID-19, ku iya nambah.

Sentang pekara ke bekaul, JPBNS madah Opis Pengerai Nengeri Sarawak (JKNS) kemari ngenukuka siti kluster baru iya nya Kluster Seladah di pelilih Kuching.

“Indeks kes ngagai kluster tu iya nya kes ke-771 ti udah disahka positif kena 23 Oktober 2020. Bisi 17 iku kontak semak ngagai kes tu udah diperesa.

“Dua ari kontak semak ditemu positif COVID-19 kena 23 Oktober 2020 lalu empat agi kontak semak ditemu positif COVID-19 kemari. Tu nyadika penyampau semua kes dalam Kluster Seladah iya nya bisi tujuh iku nyengkaum kes indeks,” ku iya nerang.

JPBNS nambah ari enam kontak ti positif tu, lima kes iya nya diri sebilik lalu siti kes ngaul penguna ngagai kes ke-771.

Pansik silik enggau pengawa nyidi kontak bukai ngagai kluster tu benung chakah dipejalaika JKNS kena nagang pengelekai nya ari balat agi nyadi, ku iya.

“Enggau ngenukuka Kluster Seladah, penyampau kluster COVID-19 ke aktif di Sarawak naka ke diatu nambah ngagai empat.

“Tiga agi iya nya kluster Bah Arnab di pelilih Kuching, Kluster Putra di Bintulu enggau Kluster Baki di Pelilih Kuching,” ku iya.

Sentang kes ke udah gerai enggau dikemendar pansut ari sepital JPBNS madahka kemari semina siti kes diripotka di HUS.

Tu nyadika penyampau semua kes positif COVID-19 ti udah gerai enggau dikemendar pansut ari sepital naka kemari bisi 728 iku tauka 91.43 peratus ari penyampau semua kes di nengeri tu.

“Penyampau kes agi diperubat enggau diberi kediri ba sepital bisi 50 iku iya nya 43 di HUS enggau tujuh agi di Sepital Miri.

“Nadai kes COVID-19 diperubat ba Unit Rawatan Rapi (ICU) lalu nadai kes nabanka nyawa baru diripotka sehari tu (kemari). Tu nyadika penyampau semua kes ti nabanka nyawa mengkang 19 iku tauka 2.39 peratus,” ku iya.

JPBNS mega madah Pelilih Kuching mengkang status Kuning enggau penyampau semua kes 26, ngaul ke berampit ba kandang menua tu ti diripotka dalam timpuh 11 hari ke udah.

Pia mega, 39 pelilih ke bukai di Sarawak agi bestatus Gadung, ku iya nambah.

Advertisement