MIRI: Penyerakup dalam parti iya nya pengering ngagai Gabungan Parti Sarawak (GPS) menang ba Pengawa Bepilih Nengeri (PRN) ti deka datai enggau terus megai nengeri tu.
Sapit Kepala Menteri Datuk Amar Awang Tengah Ali Hasan madahka pemenang nentuka perintah GPS bejalaika agenda pemansang sereta ngetanka hak rayat ti ditegika ngelama tu.
“Nya alai, kitai mesti begempung. Semina kitai dalam GPS ti dipegai Kepala Menteri ti beamat ulih nyaga Sarawak, negika hak enggau ke guna Sarawak,” ku iya nyemetak ba pengerami makai malam meri basa kaban komiti konvensyen khas Parti Pesaka Bumiputera Bersatu (PBB) Zon Utara mala ensanus.
Iya ke mega Sapit Yang Dipertua PBB Sarawak minta kaban PBB sereta parti komponen dalam GPS ngambi begempung sereta bebendar dalam PRN ti deka datai ila.
Kelimpah ari nya, rayat Sarawak patut nyadika tunjuk ajar empas pegai perintah Pakatan Harapan (PH) ngagai nengeri tu.
“Kitai mesti bebendar gawa. Anang ngambi mudah. Laban orang sepiak pan bejalaika pengawa sida enggau kitai nemu baka ni gaya maya Malaysia dipegai PH.
Ungkup Sarawak tu mih siti ajar ti dikeenggai kitai nyadi baru, PH nadai pengawa bukai. Kereja sida mutung, mutung, mutung,” ku Tengah nerang.
Iya ke mega Menteri Pemansang Mengeri enggau Pengeraja Asal Kedua madah, GPS enda baka parti politik ke bukai ti semina bisi dipeda maya pengawa bepilih aja.
Pemujur GPS iya nya kena nangkup ke guna rayat enggau nengeri ukai ba guna pangku pengawa aja ti ngasuh utai charut baka ti nyadi di Semenanjung Malaysia diatu.
“Kitai lantang ati laban ngembuan disiplin enggau endang beamat gawa ke pengelantang rayat lalu kitai gawa ukai ungkup pengawa bepilih aja.
Tetiap jam, tetiap maya, lebuh maya lantang, maya tusah. Tu chara kitai di Sarawak. Tu disiplin ke bisi dalam PBB enggau patut ditanka,” ku iya nerang.
Menteri Dagang Antarabansa enggau Industri, Terminal Industri enggau Pemansang Orang Dagang nya madah, kuing pejalai GPS iya nya deka ngemansangka nengeri sereta nentuka rayat idup begempung enggau lantang.
Dalam timpuh tiga taun, Datuk Patinggi Abang Johari Tun Openg merambu enggau bejalaika mayuh bengkah projek nengah ungkus belanja ti besai nyengkaum nampung projek ti dikinsil perintah besai PH.
“Kami lantang ati laban Kepala Menteri ulih ngangkatka penatai pemisi nengeri nengah chukai nyual ba produk minyak enggau gis ti dieksport.
Kepala Menteri deka majak bebendar negapka agi tikas penatai pemisi laban tu patut kena kitai bejalaika projek enggau nyaga pengelantang komuniti,” ku iya.
Ku iya, dalam aum Kunsil Nengeri (DUN) ti deka datai, perintah nengeri dipelaba deka nambah bajet ti beratka ngagai pekara pemansang kelebih agi ba kandang menua pesisir.
Dikena nyapai nengeri maju enggau bepenatai pemisi tinggi ba taun 2030, perintah nengeri deka mekuh ngagai pemansang sektor baka ngelumbung, begaga enggau industri.
Pia mega, ngemeratka ngagai perengkaguna infrastruktur, jalai alun, bekal ai, kuasa elekterik, telekomunikasyen, betanam betupi moden, ngangkatka digital, ngintu rampa menua, dagang temuai, pelajar enggau pemansang pengereja pengawa.
Berebak enggau nya, Tengah ke mega Chairman Konvensyen Khas PBB Zon Utara temegah enggau pemujur pengawa nya kena pun bulan nyin tadi ti udah nyadi penanda tikas ba konvensyen zon bukai.
Dulu ari tu, Kaban Kunsil Nengeri (ADUN) Mulu ke mega Chairman Pengatur, Dato Gerawat Gala madahka pemendar kaban komiti bejalaika pengawa ngenataika asil bulih pemujur nyengkaum pengandal ti takluk ngagai sama diri entara ba raban ari 17 pampang di Zon Utara.
Pengawa tu diatur berambaika jaku ‘Tropikal dan Floral’ ti dirichahka enggau pengawa pemerindang karaoke enggau sesi nyabut tikit benasit.
Sama bisi datai Sapit Menteri Perengka Pengangkut Malaysia ke mega Kaban Parlimen Limbang Hasbi Habibollah, Menteri Muda Betanam Betupi, Tanah Adat enggau Pemansang Kandang Menua ke mega ADUN Bukit Kota Datuk Dr Abdul Rahman Ismail, Menteri Muda Orang Indu, Ruang Bilik enggau Pemansang Nembiak Mit ti mega ADUN Bekenu Datuk Rosey Yunus, Menteri Muda Pemansang Dagang Antarabansa enggau Industri, Terminal Industri enggau Pemansang Orang Dagang Datuk Mohd Naroden Majais, Kaban Parlimen Sibuti Lukanisman Awang Sauni, ADUN Telang Usan Dennis Ngau sereta ADUN Lambir Ripin Lamat.