Anda di sini

Projek Selangau Waterfront disadang tembu tengan taun 2021

Advertisement
 Projek ngaga Selangau Waterfront benung digaga lalu disadang tembu dalam tengan taun 2021.
CHAKAH DIPEJALAIKA: Projek ngaga Selangau Waterfront benung digaga lalu disadang tembu dalam tengan taun 2021.

SELANGAU: Projek ngaga Selangau Waterfront ti beungkus urung RM5 juta tu ba tikas 30 peratus lalu disadang tembu dalam tengan taun 2021.

Kaban Kunsil Nengeri (ADUN) Tamin, Christoper Gira Sambang madah, pengawa ngaga projek rayat sitak Kunsil Nengeri (DUN) Tamin nya diatu benung bejalai enggau lanchar.

“Sebedau tu, pengawa ngaga tejanggal mimit ketegal pentin Atur Nagang Pemindah (PKP) berindik ari pengelekai pandemik COVID-19.

“Taja pia, diatu pengawa ngaga projek nya udah ulih ditampung baru enggau disadang tembu dalam tengan taun baru ila,” ku iya nerang maya ditelefon pengarang berita kemari.

Ku iya, nengah penemu projek nya ila deka nyapai juluk peranak di pelilih Selangau ti nganti deka bisi Watarfront enggau ngembuan kandang rampa ti manah.

“Waterfront ti bepalan ba tebing Batang Mukah ti nyendiaka palan alai aktiviti ngelantangka ati ungkup peranak ba pelilih menua nya,” ku iya.

Iya minta peranak kandang menua nya meri kerejasama ngagai ejensi pengatur enggau kunteriktor ngambika projek nya ulih ditembu nitihka timpuh ti ditetapka.

Ku iya, pengawa ngaga Waterfront Selangau iya nya dirintai ba baruh projek penemuai seraya kereja Kepala Menteri, Datuk Patinggi Abang Johari Tun Openg ke Selangau maya taun 2018 ti begunaka ungkus urung RM5 juta.

Ku iya, Selangau Waterfront ukai semina ngubah rampa pasar nya, tang siti ari palan ke baru ti patut dilawa.

“Kelimpah Selangau Waterfront, Kepala Menteri mega udha ngemendarka ngaga Kompleks Lumba enggau Main Mini ke beungkus sepenyampau RM8 juta, begunan Opis Pelilih (RM5 juta) enggau ngangkatmanah  Jalai Pasai Siong (RM17 juta),” ku iya.

Advertisement