Anda di sini

KM nemu pekara ti patut dikemerat sebedau ngatur PRN12

Advertisement
 Wan Junaidi ditanya pengarang berita pengudah bejadi Pengawa Ngemun Bantu Tumu Nampung Pelajar ungkup Nembiak UiTM pampang Sarawak ba Kampus UiTM, kemari.
NYAUT TANYA: Wan Junaidi ditanya pengarang berita pengudah bejadi Pengawa Ngemun Bantu Tumu Nampung Pelajar ungkup Nembiak UiTM pampang Sarawak ba Kampus UiTM, kemari.

KOTA SAMARAHAN: Kaban Parlimen (MP) Santubong Datuk Seri Dr Wan Junaidi pechaya kepala menteri deka ngerundingka semua pekara nyengkaum gaya ke diatu sebedau ngemendarka pengawa bepilih nengeri (PRN).

Menteri Pemansang Orang Dagang enggau Koperasi nya madahka, enggau gaya COVID-19 ti nyadi ba menua sereta mega nengeri diatu, nya udah tentu deka dirundingka kepala menteri sebedau ngererak DUN.

“Enggau gaya COVID-19 diatu, aku pechaya iya (kepala menteri) deka berundingka pekara tu sebedau ngatur pengawa bepilih.

“Kelimpah ari nya mega, kepala menteri deka meda ari sukut perintah nyikap diri tauka parti politik lalu ke pemadu berat iya nya meda ari sukut penggal DUN ti deka abis,” ku iya.

Iya madah munyi nya lebuh ditanya pengarang berita pengudah bejadika Pengawa Ngemun Bantu Tumu Nampung Pelajar ungkup Nembiak UiTM pampang Sarawak ba Kampus UiTM ditu, kemari.

Ku iya nyema dipeda diatu, Sarawak semina tinggal enda lebih ari lapan bulan sebedau DUN abis penggal kena Jun taun nyin ila.

“Entara pekara bukai ke patut diperatika iya nya gaya maya ujung taun, ari sukut sejarah kitai enda kala ngaga pengawa bepilih maya ujung taun.

“Kebuah pia maya ujung taun gaya hari di Sarawak deka betapi enggau musin landas enggau pengujan... Kitai ditu enda sebaka musin enggau di Semenanjung,” ku iya.

Ku iya madah, nyema DUN enda direrak lalu tu deka rerak kediri empu lebuh datai ba timpuh lalu perintah nadai pilih bukai tang ngatur pengawa bepilih.

Pengudah DUN direrak ku iya, baru mih Komiti Pengawa Bepilih (SPR) ngembuan kuasa bejalaika tanggungpengawa ngatur pengawa bepilih.

Taja pia, ku iya madah, pengawa mutuska kemaya DUN direrak iya nya ba baruh kuasa kepala menteri.

Lebuh ti ditanya sekalika kepala menteri ulih nangguhka pengawa bepilih nengeri, Wan Junaidi madah, nya ukai kuasa sebarang raban nyengkaum kepala menteri enggau Tuai Pemegai Menua deka nangguhka pengawa bepilih ari baruh Perintah Tetap.

“Engka mih nyadi 'darurat', nyema dipadahka darurat baka ti ari baruh Pekara 150 Konstitusyen Perintah Besai baru mih pengawa bepilih enda diatur.

“Tang selalu nya darurat tu semina bekaul enggau pekara pengelikun menua, baru mih nya dipadahka,” ku iya.

Ku Wan Junaidi madah, nyentukka diatu nadai sejarah pandemik tauka penyakit ti ngujungka menua nyau madahka darurat.

Advertisement