KUCHING: Operasyen nyidi kontak semak kes COVID-19 chakah dipejalaika ngagai bala pekereja ba palan ngaga begunan Sepital Besai Sarawak (HUS) enggau begunan lama Institut Tadbiran Awam Negara (INTAN) Sarawak.
Komiti Mutarka Penusah Ngenyit Nengeri Sarawak (JPBNS) nengah penerang madahka bisi 271 iku pekereja udah diperesa dalam operasyen nya pengudah dua iku kes positif diripotka ba endur nya.
Ari penyampau ke udah diperesa, 176 ari nya pekereja ba palan ngaga begunan HUS lalu 81 ke bukai agi ngaul pengereja pengawa kunteriktor sereta 14 iku pekereja begunan lama INTAN Sarawak.
Nangkanka nya, Opis Imigresyen Malaysia Nengeri Sarawak udah nangkap 25 iku ari pengawa operasyen nya enggau 17 iku pekereja lelaki ba palan ngaga begunan HUS lalu lapan iku agi pekereja ba begunan lama INTAN Sarawak.
JPBNS mega madahka kemari nadai kes positif baru COVID-19 dirikodka di Sarawak ti nyadika penyampau semua kes positif di Sarawak mengkang 759 kes.
Kemari mega nadai kluster baru diripotka taja bisi dua kluster iya nya Kluster Bah Arnab di Kuching enggau Kluster Putra di Bintulu agi aktif.
“Dipadah mega bisi dua kes baru ke udah gerai enggau dikemendar pansut ari sepital sehari tu (kemari) nyadika penyampau semua kes ke udah gerai sereta dikemendar pansut ari sepital diatu bisi 696 iku.
“Bisi 44 iku agi diperubat enggau diberi kediri di sepital iya nya 27 kes di HUS, lapan kes di Sepital Miri, Sepital Bintulu (7) enggau dua di Sepital Sibu,” ku iya.
Pia mega, kemari bisi enam iku dipelaba (PUI) baru diripotka enggau siku kes PUI agi nganti pemutus peresa makmal.
Bisi 131 iku Person Under Survallience (PUS) ngerejista tama dikuarantin ba 23 buah hotel di serata Sarawak.
Empat pelilih iya nya Kuching, Sibu, Bintulu enggau Lubok Antu mengkang status Kuning lalu pelilih ke bukai status Gadung.
Sentang pengawa matau pengasi Atur Nagang Pemindah Mulaika Pemanah (PKPP), raban polis udah ngeluarka dua notis sita ngagai dua iku lelaki ti ngelanggar atur kuarantin.
Maya pengawa meresa dipejalaika, siku lelaki ti diasuh kuarantin di rumah ba Dalat ditemu nadai ba rumah lalu pengawa nyidi lelaki tu benung chakah dipejalai ti dipechaya pansut gawa ba luar pelilih.
Siku agi lelaki ti diasuh kuarantin ba hotel udah ditemu ba mengeri Miri lalu diasuh pulai baru ngagai hotel sereta deka ditangkap pengudah timpuh kuarantin abis.
Raban polis mega bisi ngeluarka 13 kompaun di Pelilih Kuching (8), Miri (2), Saratok (2)enggau Kota Samarahan (1) kelimpah meresa 1,453 premis enggau 971 perengka pengangkut ba pengawa ngempang jalai alun di lima pelilih iya nya Lundu, Bau, Serian, Sri Aman enggau Lubok Antu.