PAKAN: Kaban Kunsil Nengeri (ADUN) Pakan Tan Sri William Mawan Ikom mai sereta meransang rayat ngetanka penyerakup ti tegap baka ti diasaika Sarawak kenyau ari suba.
Iya madahka Sarawak ti ngembuan peranak ke mayuh pupu bansa enggau jalai pengarap seruran nyadi chunto ngagai orang luar laban idup dalam pemaik enggau pengelantang.
Ku iya, perintah nengeri lebih agi chukup ngemeratka penegap penyerakup awakka ulih mekuh ngagai pemansang.
"Ambika chunto, perintah nengeri numbuhka Unit Pekara Jalai Pengarap Bukai (UNIFOR) ti megai tanggungpengawa ngatur polisi kena ngelakuka pemaik enggau pengelantang entara jalai pengarap.
"Kitai ba Sarawak ulih ngemeranka jalai pengarap ti nitihka peneka diri. Tu meh kunchi ngagai penyerakup kitai ngelama tu," ku iya lebuh bejaku ba pengawa nyuaka chek bantu duit ari UNIFOR ngagai gerija ti diatur ba Balai Komuniti Pakan ditu, ensanus.
Bantu duit nya dikena ngemanah agi enggau ngaga rumah sembiang baru.
Penerima bantu nya nyengkaum Gerija BEM Nanga Wak, Pakan (RM50,000); Gerija BEM Nanga Dayu Bangkit, Ulu Julau (RM100,000); Gerija BEM Sungai Pama, Sarikei (RM100,000); Gerija BEM Nanga Dayu, Sarikei (RM150,000); Gerija BEM Ulu Wak, Dendang, Pakan (RM100,000), Chapel St Francis of Assisi, Pakan (RM100,000), Gerija Magdelina Dayu, Pakan (RM50,000) enggau Chapel Rumah Jembau Lau, Nanga Kota, Pakan (RM50,000).
Mawan beterima kasih ngagai perintah nengeri ari baruh iring Kepala Menteri Datu Patinggi Abang Johari ti chukup ibuhka peminta guna rumah sembiang.