Anda di sini

PDRM enggau raban penerit adat neruska operasyen mantau tikas ngasika SOP PKPP

Advertisement
 Raban polis, soldadu enggau raban RELA lebuh bejalaika operasyen matau tikas ngasika pentin SOP COVID-19 di premis bebelika barang, barang renchit enggau palan nyual asil betanam betupi di Bintulu.
NGASIKA SOP COVID-19: Raban polis, soldadu enggau raban RELA lebuh bejalaika operasyen matau tikas ngasika pentin SOP COVID-19 di premis bebelika barang, barang renchit enggau palan nyual asil betanam betupi di Bintulu.

BINTULU: Polis Diraja Malaysia (PDRM) begulai enggau raban penerit adat ke bukai enda kala ngetuka operasyen ngasika pentin Prosedur Operasyen Standard (SOP) COVID-19 ngagai mensia mayuh dalam juluk mutuska rentayan pandemik tu.

Ketuai Polis Pelilih Menua Bintulu Superitenden Zulkipli Suhaili madah, raban nya deka chakah agi bejalaika pengawa ngasika pentin SOP Atur Nagang Pemindah Mulaika Pemanah (PKPP) tu, kelimpah udah numbuhka Raban Pengemata Ngasika SOP ke tuju nya.

Ku iya, kami begulai enggau Raban Soldadu Malaysia, Raban Penyaga Pengelikun Periman (APM), Opis Kaunsil Pemansang Bintulu (BDA), Opis Volunteer Malaysia (RELA), Ejensi Penerit Adat Maritim Malaysia (APMM) enggau Opis Kaunsil Sungai Sarawak (LLS) nyengkaum Opis Kaunsil Pemansang Industri Pengawa Berumah Malaysia (CIDB).

“Pengawa ti dipejalaika kami enda kala ngetu kelimpah raban polis begulai enggau ejensi penerit adat ke bukai chakah bejalaika pengawa matau ngagai premis ti bisi sereta palan endur makai enggau ngirup ba ditu,” ku iya bejaku ba aum media ba Bilik Operasyen Indu Opis Polis Pelilih Menua Bintulu ditu, ensana.

Ku Zulkipli, raban iya seruran ngemeratka pekara nya dikena nentuka pelilih menua Bintulu nitihka SOP kena nagang pengelekai COVID-19 ti ditetapka perintah.

“Sebarang pengawa ke ngelanggar SOP, kami enda kakang ati nangkap sereta ngukum orang ti ngelanggar pentin nya,” ku iya nyemetak.

Nengah pengawa matau nya ku iya, kami udah meri jaku tangkan ngagai 154 iku mensia mayuh ngambika seruran nitihka SOP sekalika ngena sengkabung idung enggau mulut enggau nitihka seraka fizikal.

Ku iya nyemetak, raban iya ngansak mensia mayuh ibuhka enggau bisi pemereti ati ba juluk ti dipejalaika tu ngambi nitihka SOP enggau tu iya nya tanggungpengawa kitai semua sereta ukai nya ba raban ejensi penerit adat aja.

“Kitai sama besaup nagang pengelekai tu lalu ukai semina tanggungpengawa raban bekuasa aja tang mensia mayuh patut nemu pengelekai igi penyakit tu enggau nitihka SOP tu ukai ketegal nangi kena tinggang ukum,” ku iya nerang.

Iya ngarapka komuniti enggau individu ulih sama besaup bejalaika pengawa kena nentuka pengelikun pengerai dijaga sereta rentayan pandemik COVID-19 ulih diputuska lalu SOP ti ditetapka ulih dititihka kena nyeliah ari dirampit pengelekai ti tau nabanka nyawa nya.

Advertisement