Anda di sini

Kemansangka penemu ba pengawa betanam betupi moden

Advertisement
 Rosey begulai enggau temuai ke bukai ngelepaska anak ikan nyadika kelai bejadika Pengawa Nutup 'Agriculture Community Outreach Programme' Bekenu, kemari.
BEJADI: Rosey begulai enggau temuai ke bukai ngelepaska anak ikan nyadika kelai bejadika Pengawa Nutup 'Agriculture Community Outreach Programme' Bekenu, kemari.

MIRI: Komuniti ba kandang menua tu diperansang ngaul diri dalam bidang betanam betupi moden ari Opis Betanam Betupi Sarawak enggau ejensi ti bekaul kena ngangkatka asil pengawa dagang sida.

Menteri Muda Orang Indu, Ruang Bilik enggau Pemansang Anak Mit, Datuk Rosey Yunus madahka ngaul diri ba aktiviti betanam betupi ti serius ulih ngangkatka sosioekonomi sida enggau ruang bilik sereta ngerichahka agi industri betanam betupi nengeri tu.

Kaban Kunsil Nengeri (ADUN) Bekenu nya nerangka mayuh bansa pengawa betanam betupi ti tau dikemansangka nengah bantu enggau sukung ari opis sereta ejensi betanam betupi.

“Kami ngembuan tanah ti manah, nya alai kami meransang peranak ba kandang menua tu ngaul diri enggau bebendar dalam bidang betanam betupi nangkanka nya belajar penemu betanam betupi nengah chara moden, “ ku iya pengudah bejadika Pengawa Nutup 'Agriculture Community Outreach Programme' (AgriCOP) di Balai Komuniti Bekenu, kemari.

Ku Rosey, nyema tanah puang tu dikemansangka enggau konsisten sereta holistik, lalu tu deka ngeluarka asil ti tinggi enggau di dagang ba renggat gobal.

Iya mega muji juluk Opis Betanam Betupi Sarawak ti chakah meri pengeransing enggau peransang ngagai peranak menua pesisir ngaul diri enggau serius dalam pengawa betanam betupi kena ngerichahka agi industri betanam betupi ba menua tu.

Opis Betanam Betupi Sarawak tu ku iya udah ngatur empat kus dikena meransang enggau bekunsi penemu chara betanam betupi moden ngagai peranak di menua pesisir.

Entara nya baka kus proses sos chabi, chara nanam nyiur, fertigasyen chabi enggau kulat sawit.

Agih belanja sepenyampau RM998, 680 udah diungkupka kena bejalaika projek betanam betupi ba sitak DUN Bekenu semanjai taun tu.

Tu ngaul ungkus bantu pemansang nanam nanas sepenyampau RM162,000, hidroponik (RM96,000), fertigasyen (RM369,000),  pemansang nanam kopi (RM107,680), enggau pemansang nanam nyiur pandan (RM264,000).

Sama bisi datai iya nya Pemesai Opis Betanam Betupi Bagi Menua Miri, Jackson Nanta Bernabas Baiee, Pemesai Opis Pelilih Menua Subis Jamalie Busri enggau Ketuai Raban Bansa Pelilih Menua Bekenu.

Advertisement