Anda di sini

Perintah nengeri seruran ngenukuka tanah NCR bepelasarka undang-undang

Advertisement
 Awang Tengah begambar kenang enggau bala penerima surat pala tanah di Kampung Tanjong Poting, Singai, Bau kemari. Sama bisi Henry (dua kiba) enggau Abdullah (kanan). — Gambar Roystein Emmor
KE KENANG: Awang Tengah begambar kenang enggau bala penerima surat pala tanah di Kampung Tanjong Poting, Singai, Bau kemari. Sama bisi Henry (dua kiba) enggau Abdullah (kanan). — Gambar Roystein Emmor

BAU: Tuduh ti madahka pengawa nyukat tanah ari baruh Seksyen 6 Kanun Tanah Nengeri tu iya nya chara perintah ngerampas tanah rayat endang enda amat.

Ku Sapit Kepala Menteri Datuk Amar Awang Tengah Ali Hassan nyemetak madahka, perintah nengeri seruran ngenukuka tanah Hak Adat Bansa Asal (NCR) bepelasarka undang-undang.

“Udah suah aku madahka pekara tu, nyema enda pechayaka Seksyen 6 beri pulai baru ngagai perintah.

“Nadai ti ngaga baka nya tang mayuh peminta diterima minta tanah disukat ari baruh Seksyen 6 sebedau surat pala tanah dipansutka ari baruh Seksyen 18.

“Nya alai tuduh ti madahka pengawa nyukat tanah ari baruh Seksyen 6 tu semina chara perintah kena ngerampas tanah tu endang enda betul,” ku iya.

Iya madah munyi nya lebuh bejaku ba Pengerami Nyuaka Surat Pala Tanah Seksyen 18 Kanun Tanah Nengeri ba Balai Kampung Tanjong Poting, Singai kemari.

Sama bisi datai Kaban Kunsil Nengeri (ADUN) Tasik Biru Datuk Henry Harry Jinep enggau Direktor Opis Tanah enggau Survei Abdullah Julaihi.

Awang Tengah ke mega Menteri Pemansang Kandang Mengeri enggau Pengeraj Asal Kedua nambah, pengawa nyukat tanah nya udah berengkah dipejalai kenyau ari taun 1960.

Taja pia, ku iya, dalam timpuh nya nyentuk 2010 semina 260,000 hektar tanah NCR mujur disukat.

Nya alai dikena ngelengkaska pengawa nyukat tanah tu, perintah udah mantaika inisiatif baru.

Nengah inisiatif baru tu ari 2010, perintah nengah Opis Tanah enggau Survei udah mujur nyukat lebih ari 942,000 hektar tanah di selampur Sarawak lalu udah ngenukuka lebih ari 750,000 hektar.

“Pengawa nyukat tanah tu diatur kitai ukai ngena chara mejal lalu nitihka peminta pengempu tanah ti bekaul.

“Sebedau kereja nyukat tanah NCR, perintah nengeri ari baruh Gabungan Parti Sarawak (GPS) nitih ku Awang Twengah udah nyendiaka agih belanja RM40 juta taun tu ungkup tuju nya.

Kelimpah ari nya, ku iya, perintah nengeri mega nambahka staf OpisTanah enggau Survei dikena ngelengkaska pengawa nyukat tanah ti ngaul agih belanja RM30 juta setaun.

Advertisement