KUCHING: Sarawak deka nyadi nengeri kaya sereta mansang manggai ba taun 2030 enggau penatai pemisi ninting taun entara RM12 bilion nyentuk RM15 bilion.
Presiden Parti Sa’Ati Rayat Sarawak (SUPP) Dato Sri Dr Sim Kui Hian nengah penerang ba laman ‘Facebook’ iya madahka juluk nya tentu ulih dijapai enti rayat seruran begempung enggau nagang sebarang pekara ti tau mambarka nengeri tu.
“Kena taun 2018, semua penatai pemisi ninting taun Sarawak semina RM6 bilion.
Terima kasih ngagai 22 bulan perintah besai Pakatan Harapan (PH) ti meri pemar enggau nguji deka tengkerapka Sarawak.
“Ketegal nya Gabungan Parti Sarawak (GPS) ba baruh pegai Kepala Menteri Datuk Patinggi Abang Johari Tun Openg berengkah ngiga belanja nitihka chara diri empu.
“Nya alai, beguna amat seruran lantang ati, mekuh enggau anang tekeruga enggau isu politik,” ku iya.
Dr Sim ke mega Menteri Kaunsil Kandang Menua enggau Pengawa Berumah nyambut manah bayar chukai nyual nengeri (SST) sepenyampau RM2.95 bilion ari Petroliam Nasional Berhad (Petronas) ngagai perintah nengeri, Hari Empat nyin tadi.
Bayar SST nya ku iya nerang mandangka Petronas begulai enggau kompeni minyak ke bukai ngenukuka hak Sarawak dalam Sempekat Malaysia 1963 (MA63).
“Terima kasih ngagai Menteri Besai Tan Sri Muhyiddin Yassin laban udah ngemetulka pengilap (lapan hari pengudah perintah PH menang ba pengawa bepilih besai kena 2018, PETRONAS mai kitai ngagai kort).
“Terima kasih mega ngagai PETRONAS udah mayar RM2.95 bilion, terima kasih Shell,
Murphy Oil, Pertamina enggau Sapura OMV ti udah bayar lima peratus SST bagi taun 2019 sepenyampau RM138 juta taun nyin kemari,” ku iya.
Dr Sim mega meri pengaga ati ngagai Kepala Menteri laban udah netapka SST lima peratus dalam Kunsil Nengeri (DUN) taun 2018 ke alai udah mantu penatai pemisi tambah RM3 bilion ungkup negeri ba taun 2019.
Iya ngarap menteri wang ke bukai bejalaika nya ba taun 1980 agi maya SST dikemendarka di DUN Sarawak.