SEBUYAU: Mayuh agi raban nembiak diperansang ngulu program betanam betupi ke diatur opis tauka perintah, ku Menteri Muda Infrastruktur enggau Pemansang Palan Penyangkai Kapal Datuk Julaihi Narawi.
Nitihka iya raban nembiak mesti ransing ati mungkur diri dalam aktiviti betanam betupi laban bisi peminta tinggi ngagai asil utai tanam ba dagang menua enggau antarabansa.
“Raban nembiak patut nemu sentang peluang ekonomi ti disediaka dalam sektor betanam betupi kemaya hari tu.
“Diatu, pemereti ati sentang pekara nya agi baruh laban tetiap kali program pemansang betanam betupi ti diatur semina raban ke udah beumur aja ke ngulu pengawa nya,” ku iya.
Iya nambah perintah Sarawak ngembuan mayuh macham inisiatif enggau program dalam mantu pekebun di nengeri tu kena ngangkat enggau ngemansangka sektor betanam betupi sida.
Julaihi ke mega Kaban Kunsil Nengeri (ADUN) Sebuyau madah munyi nya lebuh bejaku bejadika ‘Program Outreach Agriculture DUN Sebuyau’ kena Hari Dua nyin tadi.
Program ke diatur Opis Betanam Betupi Pelilih Simunjan ti bepalan ba Dewan PNK Sebuyau udah digulu 100 iku pesereta.
Ba pengawa nya, iya bisi nyuaka Program Bantu Musim Pengujan Perintah Nengeri Sarawak taun 2020 ungkup bulan Januari, Februari enggau Mac DUN Sebuyau sepenyampau RM495,000 ngagai Chairman Gerempung Orang Berikan Kandang Menua (PNK) Sebuyau, Setil Sauli.
Pengawa nyuaka chek kelai program nya disuaka ngagai Setil, dikena mantu orang berikan ti tekeruga ungkup zon Sebuyau ari perintah nengeri enggau bayar deka dipasuk terus ngagai akuan sida.
Sama bisi datai iya nya Pemesai Pengereja Pengawa Opis Pelilih Sebuyau Ajis Ahmad, Penulung Pemesai Opis Betanam Betupi Zakaria enggau sekeda ketuai kandang menua nya.