Anda di sini

RM2.2 juta kena ngaga jalai Kampung Mambai, Sungai Rama

Advertisement
 Julaihi (tengah) mutung riben bejadika jalai seraya dikemataka bukai.
PERENGKAGUNA PEMUN: Julaihi (tengah) mutung riben bejadika jalai seraya dikemataka bukai.

SEBUYAU: Jalai alun beungkus RM2.2 juta ungkup Kampung Sungai Rama enggau Kampung Mambai udah dipenyadika Menteri Muda Pemansang Palan Penyangkai enggau Infrastruktur Datuk Julaihi Narawi ditu kena Hari Dua empai lama.

Dua jalai genturung pendiau ba baruh agih belanja perintah nengeri semanjai 2,190 meter deka digaga enggau bererenggat.

Ba jaku pengelalu iya, Julaihi madahka perintah nengeri deka terus mekuh ngagai pemansang infrastruktur menua pesisir.

“Ba baruh perintah Gabungan Parti Sarawak (GPS), kami udah bejalaika mayuh projek pemansang infrastruktur baka ngaga jalai alun, jematan, bekal ai enggau elekterik, sekula, padang futsal enggau mayuh bengkah perengkaguna ke bukai ti dikemeratka perintah,” ku iya.

Pemansang ti dibai ukai nya 'jaku puang' laban perintah GPS ba baruh pegai Kepala Menteri Datuk Patinggi Abang Johari Tun Openg nemu guna komuniti ba menua pesisir, ku iya baru.

Ba pengawa ke sama, Julaihi ke mega Kaban Kunsil Nengeri (ADUN) Sebuyau ngungkupka geran beungkus RM5,000 ngagai Komiti Pemansang enggau Pengelikun Genturung Pendiau (JKKK) Kampung Mambai enggau Sungai Rama.

Sama bisi datai iya nya Penulung Pemesai Pengereja Pengawa Pelilih Menua Sebuyau Ajis Ahmad, Tuai Rumah Kampung Mambai Aden Teruki enggau Tuai Rumah Kampung Sungai Rama Munsang Jeti, Penghulu Agu Kaleng, Penghulu Merum Babu enggau Ketuai Raban Bansa ari kandang menua Sebuyau.

Advertisement